काठमाडौं । भोटेकोशी नदीमा आएको विनाशकारी बाढी तथा देशका विभिन्न स्थानमा आएको बाढीपहिरोका कारण काठमाडौं उपत्यकामा देखिएको एलपी ग्यास अभाव समाधान गर्न सरकारले वैकल्पिक मार्गबाट ग्यास आपूर्ति सुरु गर्ने भएको छ ।
उद्योग, वाणिज्य तथा आपूर्ति मन्त्रालयका अनुसार आजदेखि हेटौँडाबाट दैनिक १०० ट्रक भरिएको एलपी ग्यास वैकल्पिक सडकमार्फत काठमाडौं उपत्यकामा पठाएर वितरण गर्ने व्यवस्था सुरु गरिएको छ।
भाद्र १० गते आएको बाढीका कारण पृथ्वी राजमार्ग करिब दुई दिनसम्म लेदोका कारण अवरुद्ध भएको थियो । त्यसपछि कृष्णभीर क्षेत्रमा सडक भासिएपछि पृथ्वी राजमार्ग पूर्णरूपमा अवरुद्ध हुँदा एलपी ग्यास बोकेका बुलेट काठमाडौं उपत्यकामा प्रवेश गर्न सकेका छैनन् । त्यसका कारण केही दिनयता उपभोक्ताले ग्यास अभावको समस्या भोग्दै आएका छन् ।
मन्त्रालयले उपभोक्ताले दैनिक जीवनमा भोग्नुपरेको असहज अवस्थाप्रति गम्भीर ध्यानाकर्षण भएको जनाएको छ । आपूर्ति अवस्था सहज बनाउन नेपाल आयल निगम, एलपी ग्यास उद्योगी तथा व्यवसायी र सम्बन्धित निकायसँग निरन्तर संवाद, समन्वय तथा सहजीकरण भइरहेको मन्त्रालयले जनाएको छ ।
पृथ्वी राजमार्ग पूर्णरूपमा सञ्चालनमा नआएसम्म हेटौँडाबाट वैकल्पिक मार्ग हुँदै ग्यास आपूर्ति गर्ने व्यवस्था निरन्तर कायम राखिने मन्त्रालयको भनाइ छ ।
नेपाल आयल निगम तथा एलपी ग्यास व्यवसायीसँगको सहकार्यमा काठमाडौं उपत्यकामा देखिएको ग्यास अभाव आगामी केही दिनभित्र क्रमशः समाधान हुँदै जाने मन्त्रालयले विश्वास व्यक्त गरेको छ ।
मन्त्रालयले विपद्का कारण ज्यान गुमाउनेप्रति श्रद्धाञ्जली तथा शोकसन्तप्त परिवारमा समवेदना व्यक्त गर्दै घाइते तथा प्रभावित नागरिकको शीघ्र स्वास्थ्यलाभको कामना पनि गरेको छ । साथै, नागरिकको आधारभूत आवश्यकतासँग जोडिएको ग्यास आपूर्तिमा कमी हुन नदिन आवश्यक सबै पहल गरिरहेको जनाएको छ ।
