जनकपुरधाम। मधेस प्रदेश सरकारले भोटेकोशी तथा त्रिशूली नदी क्षेत्रमा आएको बाढी तथा त्यसबाट सिर्जित विपद्मा परी मृत्यु भएका मधेस प्रदेशका नागरिकका परिवारलाई प्रतिमृतक रु एक लाख पारिवारिक राहत उपलब्ध गराउने निर्णय गरेको छ ।
मुख्यमन्त्री तथा मन्त्रिपरिषद्को कार्यालय मधेस भवनमा आज बसेको प्रदेश मन्त्रिपरिषद्को बैठकले गत भदौ १० गते भोटेकोशी तथा त्रिशूली नदी क्षेत्रमा गएको बाढी तथा विपद्बाट मृत्यु भएका मधेस प्रदेशका नागरिकका परिवार वा प्रचलित कानुनबमोजिमका नजिकका हकवालालाई तत्काल आवश्यक पर्ने खर्च व्यवस्थापनका लागि प्रतिमृतक रु एक लाखका दरले पारिवारिक राहत उपलब्ध गराउने निर्णय गरेको हो ।
बैठकले बाढी तथा विपद्का कारण घाइते भएका मधेस प्रदेशका नागरिकलाई प्रदेश सरकार मातहत सञ्चालित प्रादेशिक अस्पतालमा आवश्यक स्वास्थ्य सेवा तथा उपचार निःशुल्क उपलब्ध गराउने निर्णय गरेको सरकारका प्रवक्ता तथा अर्थमन्त्री युवराज भट्टराईले जानकारी दिनुभयो ।
उहाँका अनुसार बैठकले प्रदेश सरकार मातहतका स्वास्थ्य संस्थामा उपलब्ध हुन नसक्ने विशेषज्ञ सेवा वा अत्यावश्यक उपचारका लागि सम्बन्धित निकायसँग आवश्यक समन्वय गरी उपचारको व्यवस्था मिलाउन मधेस प्रदेशको स्वास्थ्य तथा जनसङ्ख्या मन्त्रालयले सहजीकरण गर्ने निर्णय गरेको छ ।
बैठकले बाढी प्रभावित क्षेत्रमा राहत सामग्रीसमेत परिचालन गर्ने निर्णय गरेको छ । आवश्यकताका आधारमा तत्काल सात हजार थान कम्मल तथा ७०० सेट टेन्ट उपलब्ध गराइने निर्णय गरेको छ । जम्मा रु एक करोड ९६ लाख बराबरको उक्त राहत सामग्री मधेस प्रदेश सरकारका गृह, सञ्चार तथा कानुनमन्त्री फकिरा महतोमार्फत नुवाकोट तथा रसुवा जिल्लाका जिल्ला प्रशासन कार्यालयलाई हस्तान्तरण गरिने भएको छ ।
यसैगरी मन्त्रिपरिषद् बैठकले स्थानीय सेवा (गठन तथा सञ्चालन) ऐन, २०८१ मा आवश्यक संशोधन गर्न तयार गरिएको संशोधन मस्यौदाउपर राय तथा परामर्श प्राप्त गर्न प्रदेश लोकसेवा आयोगमा लेखी पठाउने निर्णय गरेको छ । प्रदेश सरकारका अनुसार स्थानीय सेवासम्बन्धी विद्यमान कानुनी व्यवस्थालाई समयानुकूल र प्रभावकारी बनाउन आवश्यक संशोधनको प्रक्रिया अघि बढाइएको निर्णय गरेको छ ।
बैठकले स्थानीय तहमा कार्यरत कर्मचारीको सरुवा प्रक्रियालाई व्यवस्थित, पारदर्शी, अनुमानयोग्य तथा न्यायोचित बनाउन तयार गरिएको ‘स्थानीय तहका कर्मचारीहरूको सरुवा मापदण्ड, २०८३’ समेत स्वीकृत गरेको मन्त्री भट्टराईले बताउनुभयो । रासस
