काठमाडौं । नुवाकोटस्थित त्रिशूली–३ ‘बी’ जलविद्युत् आयोजनास्थलमा फसेका व्यक्तिको खोज तथा उद्धार कार्यलाई तीव्रता दिन नेपाली सेनासहितको प्राविधिक टोली घटनास्थलमा परिचालित भएको छ ।
आयोजनाका प्रमुख, परामर्शदाता कम्पनीका प्रमुख तथा साइट इन्जिनियरसहित नेपाली सेनाको टोली घटनास्थलमा पुगेर उद्धार कार्य अघि बढाएको हो ।
टोलीले आयोजनास्थलको भौगोलिक तथा प्राविधिक अवस्थाको स्थलगत निरीक्षण गर्दै सम्भावित जोखिमको मूल्यांकन गरिरहेको छ ।
सोही आधारमा सुरक्षित ढंगले खोज तथा उद्धार कार्य अघि बढाइएको जनाइएको छ ।
उद्धारमा संलग्न विभिन्न निकायबीच आवश्यक समन्वयसमेत भइरहेको छ ।
प्रतिकूल मौसम र चुनौतीपूर्ण भौगोलिक अवस्थाका कारण उद्धार कार्य जटिल बने पनि सम्भावित जोखिमलाई ध्यानमा राख्दै आवश्यक जनशक्ति, उपकरण तथा स्रोतसाधन परिचालन गरिएको छ ।
