काठमाडौँ । नेपाली कांग्रेसका सभापति गगन थापाले प्राकृतिक विपत्तिका बेला सरकारलाई पूर्ण सहयोग गर्नु पार्टीको प्राथमिकता रहेको बताएका छन्। उनले संकटको नेतृत्व सरकारले नै गर्नुपर्ने र कांग्रेसले सरकारलाई आवश्यक सहयोग गर्ने स्पष्ट पारे।
कांग्रेस पार्टी कार्यालयमा आयोजित विपद् व्यवस्थापनसम्बन्धी बैठकमा थापाले उद्धार तथा राहतमा देखिएका कमजोरी औँल्याउनु सरकारको आलोचना नभई सहयोगको हिस्सा भएको बताए।
‘कहाँ ग्याप छ, कहाँ काम हुन सकेको छैन भनेर औँल्याउनु आलोचना होइन, सरकारलाई सहयोग पुर्याउनु हो,’ उनले भने।
थापाले कांग्रेसका केन्द्रीय सदस्य, सांसद तथा देशभरका निर्वाचित जनप्रतिनिधिलाई स्वेच्छिक रूपमा प्रधानमन्त्री राहत कोषमा रकम जम्मा गर्न आग्रह गरे।
पार्टीका विभिन्न तह र समितिबाट सङ्कलन हुने रकम एकमुष्ट रूपमा प्रधानमन्त्री राहत कोषमा बुझाउने तयारी रहेको उनले जानकारी दिए।राहत वितरणमा दोहोरोपन नहोस् भन्ने उद्देश्यले पार्टीले यस्तो व्यवस्था गर्न लागेको उनको भनाइ थियो।
विशेषगरी सुरुङ तथा जटिल भौगोलिक क्षेत्रमा फसेका नागरिकको उद्धारका लागि नेपालसँग पर्याप्त प्राविधिक क्षमता नभए विदेशी सहयोग लिन हिचकिचाउन नहुने थापाले बताए। यस विषयमा आफूले परराष्ट्रमन्त्रीसँग समेत कुराकानी गरिसकेको उनले जानकारी दिए।
‘हामीसँग भएको स्रोतले मात्र पुग्दैन भने बाहिरको मद्दत लिएर भए पनि नागरिकको ज्यान जोगाउनुपर्छ,’ थापाले भने।
विपद् व्यवस्थापनमा स्थानीय तहको भूमिका महत्वपूर्ण हुने उल्लेख गर्दै थापाले संघीय सरकारले स्थानीय सरकारसँग प्रभावकारी समन्वय गर्नुपर्नेमा जोड दिए।
स्थानीय तहलाई पन्छाएर विपद्को सामना गर्न नसकिने उनको भनाइ थियो। थापाले भोलि आफैँ बाढी–पहिरो प्रभावित क्षेत्रमा पुगेर स्थलगत अवस्था बुझ्ने र थप राहत तथा उद्धारका लागि पहल गर्ने जानकारी दिए।
बैठकमा नुवाकोट, रसुवा र धादिङका कांग्रेस नेता तथा कार्यकर्ताले सम्बन्धित क्षेत्रमा भएको क्षति, उद्धार तथा राहतको अवस्थाबारे जानकारी गराएका थिए।
