जनकपुरधाम । नेपाली कांग्रेसका नेता विमलेन्द्र निधीले देशको वर्तमान संघीय लोकतान्त्रिक गणतन्त्रात्मक प्रणाली र संविधानको रक्षाका लागि व्यवसायीहरूको सक्रियता आवश्यक रहेको बताउनुभएको छ ।
जनकपुरधाम सुनचाँदी व्यवसायी संघको नवनिर्वाचित पदाधिकारीहरूको पद हस्तान्तरण कार्यक्रमलाई सम्बोधन गर्दै नेता निधीले नेपाली जनताको लामो संघर्ष तथा दुई पटकको संविधानसभा निर्वाचनबाट प्राप्त संघीय संरचना र संविधानमाथि विभिन्न पक्षबाट प्रहार भइरहेको बताउनुभयो ।
राजनीतिक प्रणालीमाथि संकट उत्पन्न हुँदा त्यसको प्रत्यक्ष असर व्यवसाय क्षेत्रमा समेत पर्ने उल्लेख गर्दै उहाँले व्यवसायीहरूलाई राजनीतिक विषयमा चासो राख्न र लोकतान्त्रिक प्रणालीको संरक्षणका लागि एकजुट हुन आग्रह गर्नुभयो ।
निधीले भन्नुभयो, “देशमा सात प्रदेश, ७५३ स्थानीय तह र ६ हजार ७४३ वडासहितको ऐतिहासिक संरचना बनेको छ । यसको सफल कार्यान्वयन आजको आवश्यकता हो । तर राजनीतिक दलहरूबीचको आन्तरिक द्वन्द्व र अन्य कारणले संघीयता, लोकतन्त्र र समावेशितामाथि खतरा उत्पन्न भएको छ । राजनीति नेताहरूको मात्र विषय हो भनेर नठान्नुस्, यो तपाईंहरूको पनि प्रत्यक्ष सरोकारको विषय हो । प्रणाली नै रहेन भने कुनै पनि व्यवसाय सुरक्षित रहन सक्दैन ।”
कार्यक्रममा उहाँले सुनचाँदी व्यवसाय क्षेत्रमा देखिएका समस्याबारे समेत सरकारको ध्यानाकर्षण गराउनुभयो । सुनचाँदी व्यवसायीलाई ‘कालोबजारी’का रूपमा हेर्ने सरकारी दृष्टिकोण गलत रहेको भन्दै उहाँले यस्तो दृष्टिकोण तत्काल परिवर्तन गर्नुपर्नेमा जोड दिनुभयो ।
सुनचाँदी व्यवसायीका लागि सहज, सुरक्षित र मर्यादित कानुन निर्माण गरी भयमुक्त वातावरणमा व्यवसाय सञ्चालन गर्ने व्यवस्था मिलाउनुपर्ने उहाँको भनाइ थियो । ग्राहकबाट फिर्ता लिएको वा व्यवसायीले खरिद गरेको सुन बैंकहरूले सहज रूपमा खरिद गर्ने उचित व्यवस्था हुनुपर्ने माग पनि उहाँले गर्नुभयो ।
त्यस्तै, सुनचाँदी व्यवसायीप्रति रहेको नकारात्मक दृष्टिकोण अन्त्य गरी उनीहरूको सामाजिक मर्यादा कायम गर्नुपर्नेमा निधीले जोड दिनुभयो । बैंकिङ प्रणालीमा देखिने तरलता अभावले व्यवसायमा असर पारिरहेको उल्लेख गर्दै उहाँले बैंकिङ प्रणालीलाई थप व्यावहारिक र व्यवसायीमैत्री बनाउनुपर्ने आवश्यकता औँल्याउनुभयो ।
निधीले सुनचाँदी व्यवसाय देशको अर्थतन्त्रसँग प्रत्यक्ष जोडिएको क्षेत्र भएकाले यसलाई व्यवस्थित र सम्मानजनक रूपमा सञ्चालन गर्ने वातावरण निर्माण गर्न सरकार गम्भीर हुनुपर्ने बताउनुभयो ।
