काठमाडौंः राजश्व अनुसन्धान विभागले नेपालगंज उपमहानगपालिका वडा नं १ खजुरा रोडस्थित नेपाल पान मसला उद्योगका प्रोप्राइटर कुतबुद्दीन शेषले राजस्व चुहावट गरेको अभियोगमा ७ करोड ५२ लाख रूपैयाँ बिगो कायम गरी बाँके जिल्ला अदालतमा सोमबार मुद्दा दायर गरेको छ ।
विभागले छानबिन तथा अनुसन्धान गर्दा उद्योगले कच्चा पदार्थको हिसाब किताब एवम् लेखा लापरवाही तथा त्रुटिपूर्ण तरिकाले राखी प्रचलित कानून बमोजिम कच्चा पदार्थ एवम् प्याकेजिङ्ग सामग्रीको खपत र सो बाट हुने उत्पादनको हिसाब उद्योग विभागबाट प्राप्त भएको शर्त अनुसार नराखी बढी गुट्खा उत्पादन गरी स्टिकर नलगाएर बिक्री वितरण गरेको जनाएको छ ।
उद्योगी कुतबुद्दीनसँगको बयान, कारोबारसँग सम्बन्धित कागजातहरुको विश्लेषण, राजस्व चुहावट गरेको विवरण तथा राजस्व चुहावटसँग सम्बन्धित बरामद भएको अन्तःशुल्क स्टिकर नलगाएको गुट्खाको छानबिन तथा विश्लेषण गर्दा ७ करोड ५२ लाख जरिवाना र कैद सजाय समेत मागदाबी लिई मुद्दा दर्ता गरिएको विभागले जनाएको छ ।
पछिल्लो समय राजश्व चुहावटसँग सम्बन्धित छानबिन, अनुसन्धान र मुद्दा दर्ताको क्रमलाई विभागले तिब्र बनाएको विभागका महानिर्देशक दीर्घराज मैनालीले बताउनुभयो ।
