काठमाडाैंः नेपाल भ्रमणमा रहनुभएका चीनका विदेशमन्त्री वाङ यीले मंगलबार नेकपा अध्यक्ष पुष्पकमल दाहाल प्रचण्ड र नेपाली काँग्रेसका सभापति शेरबहादुर देउवासँग भेटवार्ता गर्ने कार्यक्रम रहेकाे छ ।
नेपालकाे तीन दिने भ्रमणमा रहनुभएका विदेशमन्त्री वाङ आजै स्वदेश फर्कनुहुनेछ ।
परराष्ट्र मन्त्रालयका अनुसार विदेशमन्त्री वाङले प्रचण्ड र देउवालाई राजधानीको मेरियट होटलमा बिहान करिब ९ बजे भेट्नु हुनेछ । त्यसपछि चिनियाँ दूतावासको कार्यक्रमा सहभागी हुने वाङ दिउँसो चीनतर्फ प्रस्थान गर्नुहुनेछ ।
उहाँ पाकिस्तानको भ्रमण सम्पन्न गरी नेपाल आउनुभएको थियो ।
नेपालमा रहँदा उहाँले राष्टपति, प्रधानमन्त्रीसँग शिष्टाचार भेटवार्ता गर्नुका साथै परराष्ट मन्त्री प्रदीपकुमार ज्ञवालीसँग व्दिपक्षीय भेटवार्ता गर्नु भएको थियो । त्यसक्रममा नेपाल र चीनबीच तीनवटा सम्झौतामा हस्ताक्षर भएका थिए । चीनले मुस्ताङमा अस्पताल निर्माण गर्ने, ५ हजार थान पाल उपलब्ध गराउने तथा नेपालमा चिनियाँ भाषा कक्षाहरू संचालन गर्ने सहमति भएको छ ।
यद्यपि विदेशमन्त्री वाङ खासगरी चीनका राष्ट्रपति सी चिनफिङको नेपाल भ्रमणको संभावनाका बारेमा छलफल गर्न आउनुभएको अनुमान गरिएको छ ।
