काठमाडौँ । नेपालमा हरित अर्थतन्त्रको विकास गर्दै युवाका लागि दिगो तथा मर्यादित रोजगारीका अवसर सिर्जना गर्ने उद्देश्यले तयार पारिएको ‘नेपाल हरित रोजगारी मिसन’ सम्बन्धी प्रतिवेदन युवा, श्रम तथा रोजगारमन्त्री रामजी यादवसमक्ष पेस गरिएको छ।
नेपालमा हरित रोजगारी प्रवर्द्धनका लागि गठित कार्यदलले तयार पारेको प्रतिवेदन बिहीबार मन्त्री यादवसमक्ष पेस गरेको हो। मन्त्रालयको समन्वयमा सञ्चालन गर्ने प्रस्ताव गरिएको मिसनले हरित अर्थतन्त्रलाई रोजगारीसँग जोड्दै आर्थिक रूपान्तरण गर्ने परिकल्पना गरेको छ।
प्रस्तावित मिसनमार्फत सबैका लागि हरित सीप तथा मर्यादित रोजगारीका अवसरमा पहुँच सुनिश्चित गर्ने लक्ष्य राखिएको छ। हरित सीप, उद्यमशीलता र लगानीयोग्य परियोजनालाई रोजगारीसँग आबद्ध गर्दै आगामी पाँच वर्षमा १ लाख ५० हजार हरित रोजगारी सिर्जना गर्ने लक्ष्य निर्धारण गरिएको छ।
मिसनले युवालाई हरित क्षेत्रमा आवश्यक सीप प्रदान गर्ने, हरित उद्यमशीलतालाई प्रोत्साहन गर्ने तथा लगानीयोग्य परियोजनामार्फत रोजगारीका नयाँ अवसर सिर्जना गर्ने उद्देश्य लिएको छ।
