काठमाडाैँ । मदन भण्डारी राजमार्गअन्तर्गत गुल्मीको रिडी–भेँडुवा र रिडी–खर्ज्याङ सडकखण्ड विस्तारका क्रममा प्रभावित घरधनीहरूले क्षतिपूर्तिबापतको रकम प्राप्त गरेका छन् ।
मदन भण्डारी राजमार्ग योजना कार्यालय, गुल्मीले सडक विस्तारका क्रममा प्रभावित क्षेत्रका घरधनीलाई रु १० करोड ३६ लाख ७१ हजार ४५९ क्षतिपूर्ति उपलब्ध गराएको हो ।
मुआब्जा तथा क्षतिपूर्ति निर्धारण समितिले गरेको मूल्याङ्कनका आधारमा सम्बन्धित घरधनीहरूको बैंक खातामा रकम जम्मा गरिएको मदन भण्डारी राजमार्ग योजना कार्यालय गुल्मीका इन्जिनियर एवं सूचना अधिकारी प्रभात तिवारीले जानकारी दिनुभयो ।
उहाँका अनुसार रिडी–भेँडुवा सडकखण्डका १३८ जना घरधनी र रिडी–खर्ज्याङ सडकखण्डका ४६ जना घरधनीलाई क्षतिपूर्ति उपलब्ध गराइएको छ ।
सडक विस्तारका क्रममा घर तथा अन्य संरचना प्रभावित भएपछि समितिले गरेको मूल्याङ्कनका आधारमा क्षतिपूर्ति वितरण गरिएको कार्यालयले जनाएको छ । सडक निर्माण तथा विस्तारलाई तीव्रता दिन प्रभावित घरधनीलाई क्षतिपूर्ति उपलब्ध गराइएको हो ।
