काठमाडौं । कलाकार तथा सामाजिक अभियन्ता सीताराम कट्टेल ‘धुर्मुस’ले आफ्नै देशमा न्यायको आशामा राज्यका विभिन्न निकायमा धाउँदा पनि आफ्नो समस्या समाधान नभएको गुनासो गरेका छन्।
सामाजिक सञ्जालमार्फत भावुक अभिव्यक्ति सार्वजनिक गर्दै कट्टेलले छोरीसहित मातृभूमि फर्किएर दुई महिनासम्म समस्या समाधानका लागि अथक प्रयास गरेको बताएका छन्। न्यायको आशामा राज्यका विभिन्न ढोका पुगे पनि आफ्नो आवाज नसुनिएको उनको भनाइ छ।
उनले आफ्नो समस्या समाधान हुनुको सट्टा भरतपुर महानगरपालिकाबाट विनियोजित १५ करोड रुपैयाँको बजेटसमेत फ्रिज हुने अवस्था आएको उल्लेख गरेका छन्। आफूले १८ करोड ४३ लाख रुपैयाँको भार, अधुरा सपना र मनभरिको पीडा बोकेर पुनः मातृभूमिबाट फर्किन बाध्य भएको उनले बताएका छन्।
‘आफ्नै देशमा न्याय खोज्दा आफ्नै आवाज बेवारिसे भएको अनुभूति भएको छ,’ कट्टेलले लेखेका छन्।
समाज र राष्ट्रका लागि इमानदारीपूर्वक केही गरौँ भन्ने उद्देश्यले आफूले आफ्नो उर्वर समय समर्पण गरेको स्मरण गर्दै उनले राज्यबाट पाएको प्रोत्साहनप्रति समेत प्रश्न उठाएका छन्।
यद्यपि, निराशाबीच पनि आफूमा आशा भने बाँकी रहेको उनले बताएका छन्। कुनै दिन राज्यले आफ्नो पीडा सम्झिने, समयले सत्य बोल्ने र संघर्षको मूल्य बुझिने विश्वास उनले व्यक्त गरेका छन्।
‘त्यो दिन आफ्नै देशमा न्याय खोज्नेहरूको आवाज दबिनुपर्ने छैन,’ उनले लेखेका छन्।
आफू चाँडै पुनः सबैसँग भेट हुने आशामा रहेको बताउँदै कट्टेलले सामाजिक सञ्जालमार्फत शुभेच्छुक तथा समर्थकप्रति माया र सम्मानसमेत व्यक्त गरेका छन्।
