काठमाडौँ । राष्ट्रिय स्वतन्त्र पार्टी (रास्वपा) की सांसद रचना खतिवडा खत्रीले आगामी भदौ २३ गते ‘जेन–जी’ आन्दोलनको एक वर्ष पूरा हुने अवसरमा प्रधानमन्त्रीले देशवासीका नाममा सम्बोधन गर्नुपर्ने माग गर्नुभएको छ।
प्रतिनिधि सभाको मंगलबारको बैठकको शून्य समयमा बोल्दै सांसद खतिवडाले भ्रष्टाचारको अन्त्य, सुशासन र सुरक्षित भविष्यका लागि युवाले गरेको बलिदानको स्मरण गर्दै उक्त दिन प्रधानमन्त्रीले सहिदहरूको सम्मानमा विशेष सम्बोधन गर्नुपर्ने बताउनुभयो।
उहाँले जेन–जी आन्दोलनका कति माग पूरा भए, कति बाँकी छन्, आन्दोलनका घाइतेहरूको अवस्था कस्तो छ र भ्रष्टाचारीमाथि कारबाहीको प्रक्रिया कहाँ पुगेको छ भन्नेबारे सरकारले स्पष्ट जानकारी दिनुपर्ने माग गर्नुभयो।
“देशले जान्नुपर्छ, कति माग पूरा भए, कति बाँकी छन् र भ्रष्टाचारीलाई कारबाही हुन्छ कि हुँदैन ? सरकारलाई राम्रो काम गर्न कसले रोकिरहेको छ र सहिद परिवार एवं घाइतेहरूले कहिले न्याय पाउँछन्,” उहाँले भन्नुभयो।
वर्तमान सरकार भदौ २३ को बलिदानकै जगमा बनेको उल्लेख गर्दै सांसद खतिवडाले उक्त दिन प्रधानमन्त्रीले देशव्यापी रूपमा सहिदहरूको नाममा सम्बोधन गरी जनतालाई स्पष्ट जवाफ दिनुपर्नेमा जोड दिनुभयो।
