काठमाडौं। गणेश इलेक्ट्रोनिक्स एण्ड मोबाइल सेन्टरबाट ३५० रुपैयाँको सामान खरिद गरेका एक उपभोक्ताले करदाता प्रोत्साहन पुरस्कारअन्तर्गत १० लाख रुपैयाँको बम्पर उपहार जितेका छन्।
आन्तरिक राजस्व विभागले साउन महिनाको दोस्रो पाक्षिक करदाता प्रोत्साहन पुरस्कारअन्तर्गत बम्पर उपहार विजेताको घोषणा गरेको हो। विभागका अनुसार गणेश इलेक्ट्रोनिक्स एण्ड मोबाइल सेन्टरबाट ३५० रुपैयाँको सामान खरिद गर्ने उपभोक्ता बम्पर उपहारका लागि छनोट भएका हुन्।
साउन १६ गतेदेखि ३१ गतेसम्म नियमसम्मत कारोबारमा सहभागी भएका उपभोक्तामध्येबाट विजेता छनोट गरिएको हो। बम्पर उपहारबापत विजेताले १० लाख रुपैयाँ प्राप्त गर्नेछन्। उक्त पुरस्कार रकममा प्रचलित कानुनअनुसार २५ प्रतिशत कर लाग्नेछ।
करदाता प्रोत्साहन पुरस्कार योजनाले साना कारोबार गर्ने उपभोक्तालाई समेत औपचारिक तथा नियमसम्मत कारोबारमा सहभागी हुन प्रोत्साहित गरेको विभागले जनाएको छ।
