काठमाडाैँ । नेकपा संयुक्तका कार्यवाहक अध्यक्ष घनश्याम भुसालले नेपाली काँग्रेसको आधिकारिकतासम्बन्धी विवादमा सर्वोच्च अदालतले पुनरवलोकनका लागि निस्सा दिनु अस्वाभाविक भएको टिप्पणी गर्नुभएको छ ।
आइतबार काठमाडौंमा आयोजित ‘वामपन्थी आन्दोलन अब के गर्ने ?’ विषयक राष्ट्रिय बहसमा बोल्दै भुसालले विशेष महाधिवेशनबाट निर्वाचित गगनकुमार थापा नेतृत्वको काँग्रेसलाई दिइएको वैधानिकता सर्वोच्च अदालतको आदेशबाट उल्टिन सक्ने आशंका व्यक्त गर्नुभयो ।
उहाँले उक्त मुद्दामा सर्वोच्च अदालतको कदमपछि मुलुकको राजनीतिक परिस्थिति थप जटिल बन्न सक्ने बताउँदै त्यसले संविधान र लोकतन्त्रमाथि समेत संकट निम्त्याउन सक्ने चेतावनी दिनुभयो ।
भुसालले सरकार र सत्तारुढ दलले आफ्ना कमजोरी ढाकछोप गर्न ठूला गतिविधि गर्न सक्ने वा पुरानै नेतृत्वलाई निरन्तरता दिने प्रयास गर्न सक्ने आरोप लगाउनुभयो । उहाँले सत्तारुढ दल राष्ट्रिय स्वतन्त्र पार्टी (रास्वपा)ले पुराना राजनीतिक शक्तिहरूमा पुरानै नेतृत्व कायम रहोस् भन्ने चाहेको दाबीसमेत गर्नुभयो ।
उहाँले काँग्रेस विवादसम्बन्धी मुद्दामा सर्वोच्च अदालतले दिएको निस्साले गगन थापा नेतृत्वको काँग्रेसको वैधानिकता उल्टिन सक्ने अवस्था देखिएको बताउनुभयो ।
‘अदालतले गगनहरूको मुद्दा उल्टिन सक्ने गरी एउटा निस्सा जारी गरेको छ । यो यसै भएको हो ? अब के हुनेवाला देख्दैछु भने, यदि त्यस्तो भयो भने दुईवटा सम्भावना देखिन्छन्,’ उहाँले भन्नुभयो, ‘उनीहरूले आफ्ना नालायकी र कमजोरी ढाक्न अझ ठूला गतिविधि गर्न सक्छन् । मनपरी गर्न सक्छन् वा फेरि पुरानै नेतृत्वलाई राखेर अघि बढ्न खोज्न सक्छन् ।’
भुसालले पुराना नेतृत्व कायम रहँदा नयाँ भनिएका राजनीतिक शक्तिको वैधानिकता पनि कायम रहने दाबी गर्नुभयो । अदालतको कदम त्यस दिशामा जान नहुने बताउँदै उहाँले राजनीतिक अस्थिरताको अन्तिम प्रहार संविधान र लोकतन्त्रमाथि पर्न सक्ने चेतावनी दिनुभयो ।
‘यी वितण्डाहरूको अन्तिम प्रहार संविधानमाथि हुनेछ, लोकतन्त्रमाथि हुनेछ र मुलुक एउटा डरलाग्दो संकटतर्फ जानेछ,’ उहाँले भन्नुभयो ।
उहाँले नयाँ र पुराना राजनीतिक शक्तिबीच सम्झौता हुनसक्ने सम्भावना पनि औँल्याउनुभयो । मुलुकको विद्यमान आर्थिक अवस्थाप्रति राजनीतिक दलहरूको पर्याप्त चासो र चिन्ता नरहेको भन्दै उहाँले आगामी दिनमा आर्थिक संकट थप गहिरिन सक्ने चेतावनी दिनुभयो ।
भुसालले काँग्रेस विवादसम्बन्धी मुद्दा उल्टिए त्यसले संविधान र लोकतन्त्रमाथि समेत प्रहार गर्न सक्ने बताउनुभयो ।
