काठमाडौं । नेकपा संयुक्तका कार्यवाहक अध्यक्ष घनश्याम भुसालले गत २१ फागुनमा सम्पन्न प्रतिनिधि सभा निर्वाचनमा कम्युनिष्ट दलहरू कसरी पराजित भए भन्ने विषयको समीक्षा अझै हुन नसकेको बताउनुभएको छ ।
आइतबार काठमाडौंमा आयोजित ‘वामपन्थी आन्दोलन अब के गर्ने ?’ विषयक राष्ट्रिय बहसमा बोल्दै नेता भुसालले कम्युनिष्ट दलहरूले निर्वाचनमा अनपेक्षित र व्याख्या गर्न कठिन पराजय व्यहोरेको बताउनुभयो ।
उहाँले निर्वाचनपछि मुलुकको राजनीतिक अवस्था थप जटिल बन्दै गएको टिप्पणी गर्नुभयो । निर्वाचन सम्पन्न भएकै दिन आफूले मुलुक नालायकहरूबाट शासित हुँदै आएकोमा अब लफङ्गाहरूबाट शासित हुने अवस्था आउन सक्ने टिप्पणी गरेको स्मरण गर्दै उहाँले पछिल्लो राजनीतिक घटनाक्रमले आफ्नो आशंका थप गम्भीर बनेको बताउनुभयो ।
‘हामी हारेका छौँ । हामी यसरी हारेका छौँ कि कसरी हार्यौँ भनेर अहिलेसम्म पत्तो पाएका छैनौँ,’ उहाँले भन्नुभयो, ‘यो त्यो तहको अनपेक्षित पराजय हो, जसको व्याख्या गर्न पनि कठिन छ ।’
नेता भुसालले वर्तमान सरकार यही गतिमा थप दुई वर्ष अघि बढे मुलुकले गम्भीर राजनीतिक दुर्घटना व्यहोर्न सक्ने चेतावनी दिनुभयो । पछिल्लो परिस्थितिले समाजमा अझ डरलाग्दा राजनीतिक दुर्घटना निम्तिने जोखिम बढाएको उहाँको भनाइ थियो ।
उहाँले कम्युनिष्ट आन्दोलनको गम्भीर समीक्षा गरी कमजोरी पहिचान गर्नुपर्ने र त्यसपछि थप सशक्त भएर जनतामाझ जानुपर्ने आवश्यकता औँल्याउनुभयो ।
–न्युज एजेन्सी नेपाल
