काठमाडौं । वाणिज्य, आपूर्ति तथा उपभोक्ता संरक्षण विभागले काठमाडौंका विभिन्न होटल तथा फर्मको अनुगमन गर्दै ग्यास अभावका बेला आवश्यकताभन्दा बढी ग्यास सिलिण्डर मौज्दात नराख्न निर्देशन दिएको छ।
विभागले बिहीबार काठमाडौंका विभिन्न उद्योग तथा फर्ममा अनुगमन निरीक्षण गरी उपभोक्ता संरक्षण ऐन, २०७५ तथा उपभोक्ता संरक्षण नियमावली, २०७६ बमोजिम आवश्यक निर्देशन तथा कारबाही गरिएको जनाएको छ।
अनुगमनका क्रममा काठमाडौं महानगरपालिका–१०, नयाँ बानेश्वरस्थित द एभरेष्ट होटलले आफूलाई आवश्यक परेको समयमा सहज रूपमा ग्यास उपलब्ध हुनुपर्ने अपेक्षा राखेको पाइएको विभागले जनाएको छ।
त्यस्तै, काठमाडौं महानगरपालिका–९, बत्तीसपुतलीस्थित द्वारिकाज काठमाडौं भिलेज होटल प्रालिलाई ग्यास अभावका बेला आफूलाई आवश्यक पर्नेभन्दा बढी ग्यास भण्डारण नगर्न निर्देशन दिइएको छ।
काठमाडौं महानगरपालिका–१३, ताहाचलस्थित सोल्टी होटल लिमिटेड र सिटी होटल लिमिटेडलाई पनि होटलको आवश्यकताअनुसार मात्र ग्यास सिलिण्डरको मौज्दात राख्न निर्देशन दिइएको विभागले जनाएको छ।
काठमाडौं महानगरपालिका–२, लाजिम्पाटस्थित ओरियण्टल होटल्स लिमिटेड (र्याडिसन)लाई आवश्यक परिमाणमा मात्र ग्यास सिलिण्डर खरिद गर्न तथा अनावश्यक मौज्दात नराखी व्यवसायीको नैतिक जिम्मेवारी निर्वाह गर्न निर्देशन दिइएको छ।
यसैगरी, काठमाडौं महानगरपालिका–२७, मासंगल्लीस्थित मिस फेशन प्रालि (नारी फेशन प्रालि)लाई सामान्य निर्देशन दिइएको विभागले जनाएको छ।
विभागले ग्यासको आपूर्ति व्यवस्थालाई सहज बनाउन व्यवसायी तथा उपभोक्ताले आवश्यकताभन्दा बढी ग्यास मौज्दात नगरी जिम्मेवार व्यवहार गर्नुपर्नेमा जोड दिएको छ।
