काठमाडौं । नाइमा नेपाल मोबिलिटी एक्स्पो २०२६ मा सहभागी अवलोकनकर्तालाई लक्षित गर्दै साझेदार बैंकहरूले अटो लोनमा विशेष ब्याजदर तथा सुविधा उपलब्ध गराएका छन्।
नेपाल अटोमोबाइल्स इम्पोर्टर्स एन्ड म्यानुफ्याक्चरर्स एसोसिएसन (नाइमा)सँगको साझेदारीमा एक्स्पोमा को-स्पोन्सर ग्लोबल आइएमई बैंक तथा बैंकिङ पार्टनर सिद्धार्थ बैंक र एनएमबी बैंकले विशेष योजनासहित मेलास्थलबाटै कर्जा सेवाका लागि सहजीकरण गरिरहेका छन्।
आफूलाई मन परेको सवारीसाधन छनोट गरेपछि अवलोकनकर्ताले बैंकका स्टलमा पुगेर कर्जाका लागि नाम दर्ता गराउन तथा क्यूआर कोड स्क्यान गरी आवेदन दिन सक्ने व्यवस्था गरिएको छ। बैंकहरूले आधारदरमा ०.५ प्रतिशतदेखि १ प्रतिशतसम्मको प्रिमियममा कर्जा उपलब्ध गराइरहेका छन् भने सेवा शुल्क ०.५ प्रतिशत मात्रै लिइरहेको जनाएका छन्।
एक्स्पोको तेस्रो दिनसम्म अवलोकनकर्ताको संख्या बढेसँगै बैंकका स्टलमा पनि कर्जासम्बन्धी जानकारी लिन आउनेको भीड बढेको छ।
ग्लोबल आइएमई बैंकका एसएमई तथा रिटेल बैंकिङ म्यानेजर मन्जिल बिष्टले एक्स्पोमा हरेक दिन अवलोकनकर्ताको संख्या बढेसँगै बैंकको स्टलमा कर्जाबारे जानकारी लिनेको संख्या पनि उल्लेख्य रूपमा बढिरहेको बताए।
‘गाडी छनोट गरिसकेपछि हाम्रो स्टलमा आएर कर्जाका लागि नाम टिपाउने तथा क्यूआर स्क्यान गरेर आवेदन दिनेहरूको संख्या उल्लेख्य छ,’ उनले भने, ‘सवारी विक्रेता कम्पनीहरूले आकर्षक अफर ल्याएर अवलोकनकर्ताको मन जितिरहँदा त्यसलाई सहयोग पुग्नेगरी हामीले काम गरिरहेका छौँ।’
मेलामा कर्जाका लागि नाम दर्ता गराउने अवलोकनकर्तालाई सम्बन्धित बैंकका शाखासँग जोड्ने काममा पनि बैंकका स्टलहरूले सहजीकरण गरिरहेका छन्।
सिद्धार्थ बैंकका लाजिम्पाट शाखाका प्रबन्धक विष्णुप्रसाद शर्माका अनुसार स्टलमा संकलन भएका विवरण केन्द्रीय कार्यालयमा पठाउने र केन्द्रीय कार्यालयले अवलोकनकर्तालाई सम्पर्क गरी सम्बन्धित शाखासँग जोड्ने काम भइरहेको छ। कतिपय ग्राहकलाई भने मेलास्थलबाटै सम्बन्धित शाखासँग जोडिदिने गरिएको उनले बताए।
उनका अनुसार सवारीसाधन छनोट गरेपछि कर्जाका लागि नाम दर्ता गराउने अवलोकनकर्ताको संख्या हरेक दिन बढिरहेको छ।
त्यस्तै, एनएमबी बैंकले पनि मेलास्थलमा रहेको स्टलबाट अवलोकनकर्तालाई कर्जा सेवाका लागि सहजीकरण गरिरहेको जनाएको छ। बैंककी रिलेसनसिप म्यानेजर समीक्षा पन्तले नाइमा एक्स्पोलाई लक्षित गरी ब्याजदर परिमार्जन गरिएको र ग्राहकको प्रतिक्रिया उत्साहजनक रहेको बताइन्।
‘हामीले मेला अवलोकनकर्तालाई आकर्षक ब्याजदरमा कर्जा उपलब्ध गराउन सहजीकरण गरिरहेका छौँ,’ उनले भनिन्, ‘नाइमालाई लक्षित गरेर ब्याजदर रिभाइज गरेका हौँ। ग्राहकको रेस्पोन्स राम्रो आइरहेको छ।’
नेपालमा दिगो, हरित तथा प्रविधिमैत्री यातायात प्रणालीलाई प्रवर्द्धन गर्ने उद्देश्यले आयोजना गरिएको नाइमा नेपाल मोबिलिटी एक्स्पो २०२६ साउन ३१ गतेसम्म सञ्चालन हुनेछ।
एक्स्पोमा स्वदेशी तथा बहुराष्ट्रिय सवारीसाधन निर्माता तथा आयातकर्ताको उल्लेख्य सहभागिता रहेको छ। नेपालमा पहिलोपटक प्रवेश गरेका ब्रान्डदेखि नयाँ मोडलका विद्युतीय कार, ई–स्कुटर तथा विद्युतीय व्यावसायिक सवारीसाधन एक्स्पोका प्रमुख आकर्षण बनेका छन्।
