काठमाडौं । सुदूरपश्चिममा खाना पकाउने एलपी ग्यासको अभाव भएको हल्ला चलेसँगै ग्यासको बिक्री तथा आपूर्ति दुवै बढेको छ । नेपाल आयल निगम सुदूरपश्चिम प्रादेशिक कार्यालयका अनुसार चालु आर्थिक वर्षको साउन २४ गतेसम्म प्रदेशमा एक लाख १५ हजार ९९० सिलिण्डर ग्यास बिक्री भइसकेको छ ।
कार्यालय प्रमुख मनोहर डिसीका अनुसार विगत दुई आर्थिक वर्षको तथ्याङ्कको तुलनामा चालु आर्थिक वर्षको साउनको २४ दिनमै ग्यासको आपूर्ति तथा बिक्री बढेको छ । गत आर्थिक वर्ष २०८२/८३ को साउन महिनाभर एक लाख १२ हजार ७७० सिलिण्डर ग्यास बिक्री भएको थियो । आर्थिक वर्ष २०८१/८२ को साउनमा भने ९९ हजार ८४० सिलिण्डर बिक्री भएको थियो ।
यस वर्षको साउन २४ गतेसम्म गत वर्षको पूरै साउनको तुलनामा तीन हजार २२० सिलिण्डर बढी बिक्री भइसकेको छ । साउनको बाँकी अवधिमा थप ५० हजार सिलिण्डर ग्यास आउने क्रममा रहेको कार्यालय प्रमुख डिसीले जानकारी दिनुभयो ।
निगमका अनुसार आर्थिक वर्ष २०८१/८२ मा सुदूरपश्चिममा कुल ११ लाख ८० हजार ८३० सिलिण्डर अर्थात् १६ हजार ८६९ मेट्रिक टन ग्यास बिक्री भएको थियो । आर्थिक वर्ष २०८२/८३ मा भने ११ लाख ५० हजार ८३४ सिलिण्डर अर्थात् १६ हजार ४४० मेट्रिक टन ग्यास बिक्री भएको थियो । अघिल्लो आर्थिक वर्षको तुलनामा गत आर्थिक वर्षमा करिब दुई दशमलव पाँच प्रतिशत कम सिलिण्डर बिक्री भएको निगमको तथ्याङ्कले देखाउँछ ।
चालु साउन २४ गतेसम्म एक हजार ६५७ मेट्रिक टन ग्यास बिक्री भएको छ । गत आर्थिक वर्षको साउन महिनाभर एक हजार ४१६ मेट्रिक टन ग्यास बिक्री भएको थियो । यस हिसाबले गत वर्षको पूरै साउनको तुलनामा चालु साउनको २४ दिनमै ४६ मेट्रिक टन बढी ग्यास बिक्री भएको देखिन्छ ।
पछिल्ला दुई आर्थिक वर्षमा ग्यासको बिक्रीमा भने उतारचढाव देखिएको छ । आर्थिक वर्ष २०८१/८२ मा साउनमा एक लाख १२ हजार ७७० सिलिण्डर बिक्री भएकामा भदौमा ८८ हजार ३१०, असोजमा ९२ हजार ५४०, कात्तिकमा ९६ हजार ११०, मङ्सिरमा एक लाख एक हजार २९० र पुसमा ८३ हजार ५८० सिलिण्डर बिक्री भएको थियो ।
त्यस्तै, माघमा एक लाख दुई हजार ४१०, फागुनमा ९५ हजार ८३०, चैतमा ८० हजार ७८०, वैशाखमा एक लाख दुई हजार ६०, जेठमा एक लाख नौ हजार ८३० र असारमा एक लाख १५ हजार ५०० सिलिण्डर बिक्री भएको निगमको तथ्याङ्क छ ।
आर्थिक वर्ष २०८२/८३ मा भदौमा एक लाख आठ हजार ९९०, असोजमा एक लाख आठ हजार २२०, कात्तिकमा एक लाख १७०, मङ्सिरमा ९९ हजार ४००, पुसमा एक लाख चार हजार ५८०, माघमा एक लाख ९४० र फागुनमा एक लाख दुई हजार ६९० सिलिण्डर बिक्री भएको थियो । त्यसैगरी चैतमा ७७ हजार २१०, वैशाखमा ६६ हजार ७१०, जेठमा ७९ हजार १७० र असारमा एक लाख दुई हजार ९१५ सिलिण्डर बिक्री भएको थियो ।
महिनागत तुलना गर्दा आर्थिक वर्ष २०८२/८३ मा भदौमा अघिल्लो वर्षको सोही महिनाभन्दा २० हजार ६८० सिलिण्डर बढी बिक्री भएको थियो । असोजमा १५ हजार ६८०, कात्तिकमा चार हजार ६० र पुसमा २१ हजार सिलिण्डर बढी बिक्री भएको थियो । फागुनमा पनि अघिल्लो वर्षभन्दा छ हजार ८६० सिलिण्डर बढी बिक्री भएको थियो ।
तर वैशाखमा भने ग्यासको बिक्री अघिल्लो वर्षको तुलनामा ३५ हजार ३५० सिलिण्डरले घटेको थियो । जेठमा ३० हजार ६६० र असारमा १२ हजार ५८५ सिलिण्डर कम बिक्री भएको निगमको तथ्याङ्क छ । यसले प्रदेशमा ग्यासको माग तथा बिक्री महिनाअनुसार उल्लेख्य रूपमा घटबढ हुने गरेको देखाउँछ ।
चालु साउनमा भने ग्यासको माग पुनः तीव्र रूपमा बढेको छ । साउन २४ गतेसम्म बिक्री भएका एक लाख १५ हजार ९९० सिलिण्डरमध्ये रेडियन्ट (रोयल) ग्यासका ७२ हजार ९४० र सैपाल ग्यासका ४३ हजार ५० सिलिण्डर रहेका छन् ।
यसैबीच, जिल्ला प्रशासन कार्यालय कैलालीको नेतृत्वमा सोमबार धनगढीमा गरिएको बजार अनुगमनका क्रममा पनि ग्यास डिलरमा नियमित आपूर्ति भइरहे पनि उपभोक्ताबाट माग अत्यधिक बढेको पाइएको छ ।
सहायक प्रमुख जिल्ला अधिकारी खडानन्द खत्रीका अनुसार केही डिलरमा पर्याप्त मौज्दात रहे पनि कतिपय डिलरमा माग अस्वाभाविक रूपमा बढेको पाइएको छ । बजारमा पर्याप्त ग्यास आपूर्ति भइरहे पनि अभाव हुने हल्लाका कारण उपभोक्ताले अतिरिक्त सिलिण्डर भण्डारण गर्दा बजारमा दबाब देखिएको उहाँको भनाइ छ ।
“हल्लाको पछाडि लागेर अतिरिक्त सिलिण्डर थुपार्न आवश्यक छैन । बजारमा पर्याप्त ग्यास आपूर्ति भइरहेको छ”, खत्रीले भन्नुभयो ।
निगमका सुदूरपश्चिम प्रादेशिक कार्यालय प्रमुख डिसीले पनि विगत वर्षको माग र हालको आपूर्तिको अवस्था विश्लेषण गर्दा प्रदेशमा ग्यास अभाव नरहेको बताउनुभयो । उहाँका अनुसार विगत वर्षको तुलनामा अहिले बढी ग्यास आपूर्ति भइरहेको छ ।
“सुदूरपश्चिममा आपूर्तिको समस्या छैन । हामीले विगत वर्षभन्दा हाल बढी नै ग्यास आपूर्ति गरिरहेका छौँ । उपभोक्ताले हल्लाको पछि लागेर सिलिण्डर थुपार्दा समस्या भएको हुनसक्छ”, डिसीले भन्नुभयो । रासस
