काठमाडाैंः नागरिक लगानी कोषले आफ्ना शेयरधनीलाई २२ प्रतिशत शेयर लाभांश र कर प्रयोजनको लागि एक दशमलव १६ प्रतिशत नगद लाभांश दिने भएको छ ।
कोषको साेमबार राजधानीमा सम्पन्न २४औँ वार्षिक साधारणसभाले उक्त प्रस्ताव पारित गरेको हो । साधारणभाले आर्थिक वर्ष २०७४-७५ को आयव्ययसमेत पारित गरेको छ ।
साधारणसभामा कोष सञ्चालक समितिका अध्यक्ष प्रा डा रामचन्द्र भट्टराईले आव २०७४-७५ को प्रतिवेदन पेश गर्नुभयो । कोषले हालसम्म प्राप्त गरेका उपलब्धि र भावी योजनामा समावेश गरिएका कार्यक्रमको बारेमा जानकारी दिँदै उहाँले कोषको बचत परिचालन, लगानी व्यवस्थापन, पूँजी बजार सेवा, बैंक तथा वित्तीय संस्थामा रहेको निक्षेप असूली, लगानी नीति २०७५ को बारेमा बताउनुभएको थियो ।
उहाँले आम नागरिकलाई समेट्ने गरी नयाँ बचत कार्यक्रम ल्याउन कोष क्रियाशील रहेको रहेको र लगानी नीति २०७५ ले कोषको लगानीलाई पारदर्शी र प्रतिफलमुखी बनाएको उल्लेख गर्नुभयो । कोषका कार्यकारी निर्देशक रमण नेपालले कोषलाई थप व्यावसायिक र पारदर्शी बनाएर लैजाने बताउनुभयो ।
सभाले लेखापरीक्षको प्रतिवेदनसहितको २०७५ साल असार मसान्तको वासलात, नाफा नोक्सान हिसाब र नगद प्रवाह विवरण पारित गरेको छ ।
काेषले २०७३।७४ मा पनि २२ प्रतिशत बाेनस सेयर र १.५ प्रतिशत नगद लाभांश दिएकाे थियाे भने २०७२।७३ मा २१.८५ बाेनस सेयर दिएकाे थियाे । त्यसअघि २०७१।७२ मा ५० प्रतिशत बाेनस सेयर बाँडेकाे काेषले २०७०।७१ मा ३८.८९ प्रतिशत बाेनस शेयर दिएकाे थियाे ।
काेषकाे शेयर बजार पछिल्ला केही महिनादेखि लगातार घट्दै गएकाे छ । काेषकाे शेयर मूल्य चार महिनाभित्रै प्रतिशेयर करिब २७०० बाट एक हजार घटेर १७०० काे हाराहारीमा अाइपुगेकाे छ ।
