काठमाडाैँ । नारायणगढ–बुटवल सडक खण्डको स्तरोन्नति कार्य अन्तिम चरणमा पुगेको छ। करिब २० अर्ब रुपैयाँ लागतमा निर्माण भइरहेको ११३ किलोमिटर लामो सडकलाई दुई खण्डमा विभाजन गरी विस्तारको काम अघि बढाइएको हो।
सडक विभाग, आयोजना निर्देशनालय (एडिबी) का आयोजना निर्देशक चुडाराज ढकालका अनुसार विभिन्न चुनौतीका बाबजुद आयोजना अहिले सम्पन्न हुने चरणमा पुगेको छ। अन्तर–निकाय समन्वयको अभाव, निर्माण व्यवसायीको नगद प्रवाह व्यवस्थापनमा समस्या, कोभिड–१९ महामारी तथा रुख कटान अनुमति प्रक्रियामा भएको ढिलाइका कारण आयोजना निर्धारित समयभन्दा केही पछि धकेलिएको उहाँले बताउनुभयो।
एडिबीको ८५ प्रतिशत सहुलियतपूर्ण ऋण र नेपाल सरकारको १५ प्रतिशत लगानीमा निर्माण भइरहेको उक्त सडक २०७५ चैत ८ गतेदेखि विस्तारको काम सुरु भएको हो। सुरुमा ४२ महिनाभित्र निर्माण सम्पन्न गर्ने लक्ष्य राखिएको थियो।
आयोजनाअन्तर्गत ६५ किलोमिटर लामो नारायणगढ–दाउन्ने खण्डलाई पूर्वी खण्ड र ४९ किलोमिटर लामो दाउन्ने–बुटवल खण्डलाई पश्चिमी खण्डका रूपमा विभाजन गरिएको छ। सडकलाई दुई लेनबाट चार लेनमा विस्तार गर्ने क्रममा बजार क्षेत्रमा २८ किलोमिटर सडकलाई छ लेन र अन्य क्षेत्रमा चार लेनमा स्तरोन्नति गरिएको छ।
आयोजना निर्देशक ढकालले आफूले जिम्मेवारी सम्हाल्दा आयोजनाको निर्धारित म्याद सकिइसकेको र थपिएको समयसीमा पनि समाप्त हुन लागेको अवस्थामा आयोजना पूरा हुने वा नहुने विषयमा गम्भीर अन्योल रहेको बताउनुभयो। त्यसपछि निर्माण व्यवसायी, परामर्शदाता, स्थानीय सरकार तथा सम्बन्धित निकायसँग समन्वय गरी समस्या पहिचान गरेर समाधानको प्रयास अघि बढाइएको उहाँको भनाइ छ।
निर्माण सामग्रीको आपूर्ति, विद्युतका पोल स्थानान्तरण, रुख कटान अनुमति लगायतका प्रशासनिक तथा प्राविधिक अवरोध हटाइएको उहाँले जानकारी दिनुभयो। निर्माण व्यवसायी आर्थिक समस्यामा परेर पर्याप्त नगद प्रवाह र स्रोत परिचालन गर्न नसक्नु आयोजनाको मुख्य समस्या रहेको उहाँले बताउनुभयो।
समस्या समाधानका लागि नेपाल सरकारको उच्च तह, चिनियाँ राजदूतावास तथा सम्बन्धित पक्षसँग समन्वय गरी निर्माण कम्पनीको मुख्य कार्यालयसम्म विषय पुर्याइएको र आवश्यक स्रोत–साधन जुटाउन पहल गरिएको ढकालले बताउनुभयो। त्यसपछि निर्माण कम्पनीले आवश्यक स्रोत परिचालन गरी कामलाई तीव्रता दिएको र आयोजना अहिले अन्तिम चरणमा पुगेको उहाँको भनाइ छ।
नेपालको प्रमुख ‘लाइफलाइन’ सडकका रूपमा रहेको नारायणगढ–बुटवल सडक स्तरोन्नति सम्पन्न भएपछि पूर्व–पश्चिम राजमार्गअन्तर्गत यस खण्डको आवागमन थप सहज र सुरक्षित हुने अपेक्षा गरिएको छ।
– न्युज एजेन्सी नेपाल
