काठमाडाैँ । सप्तरीमा जारी कर्फ्यू आदेशलाई केही समयका लागि खुकुलो बनाइएको छ। जिल्ला प्रशासन कार्यालय सप्तरीले राजविराज नगरपालिका र बोदेबर्साइन नगरपालिका क्षेत्रका तोकिएका चार किल्लाभित्र बिहान ७ बजेदेखि ११ बजेसम्म दैनिक उपभोग्य सामग्री खरिद–बिक्री गर्न कर्फ्यू खुकुलो बनाएको हो।
जिल्लाको समग्र शान्ति सुरक्षा अवस्था तथा नागरिकको दैनिक र अत्यावश्यक कामकाजलाई ध्यानमा राख्दै जिल्ला सुरक्षा समितिको बैठकको निर्णयअनुसार कर्फ्यूमा यस्तो सहजीकरण गरिएको प्रमुख जिल्ला अधिकारी श्यामकृष्ण थापाले जारी गरेको सूचनामा उल्लेख छ।
सूचनाअनुसार उक्त अवधिमा जिल्ला प्रशासन कार्यालयको अनुमति लिएर शान्ति तथा सद्भाव कायम गर्ने उद्देश्यले र्याली गर्नसमेत सकिनेछ। अनुमति लिएर र्याली सञ्चालन गरिएको अवस्थामा सो अवधिका लागि कर्फ्यू निष्क्रिय हुने जनाइएको छ।
तर, कर्फ्यू खुकुलो गरिएको समयमा हुलदंगा, अशान्ति फैलाउने वा अन्य उद्देश्यले एकै स्थानमा पाँच जनाभन्दा बढी भेला भई उच्छृंखल गतिविधि गरेको वा गराएको पाइएमा प्रचलित कानुनबमोजिम कारबाही गरिने प्रशासनले चेतावनी दिएको छ।
बिहान ११ बजेपछि भने दुवै नगरपालिका क्षेत्रभित्र अर्को आदेश नभएसम्मका लागि कर्फ्यू आदेश पुनः निरन्तर रहने जिल्ला प्रशासन कार्यालय सप्तरीले जनाएको छ।
