काठमाडाैँ । सुनसरीको देवानगञ्ज गाउँपालिका–३, कप्तानगञ्जमा भएको गोलीकाण्डमा मृत्यु भएका दुई युवाका परिवारले शव बुझ्न अस्वीकार गरेका छन्।
सरकार र मृतकका परिवारबीच सातबुँदे सहमति भए पनि सहमति कार्यान्वयन हुनेमा आशंका व्यक्त गर्दै आफन्तले शव बुझ्न नमानेका हुन्। शुक्रबार दिउँसो शव बुझेर पोस्टमार्टमपछि अन्त्येष्टि गर्ने सहमति भएको थियो।
तर, आफूहरूलाई दबाबमा सहमतिपत्रमा हस्ताक्षर गराइएको र सहमति कार्यान्वयनको ठोस सुनिश्चितता नभएको मृतकका आफन्तले बताएका छन्। स्थानीयको विरोधपछि शव बुझ्न विराटनगर पुगेका परिवारका सदस्य तथा आफन्त पुनः देवानगञ्ज फर्किएका छन्।
गत आइतबार राति देवानगञ्ज गाउँपालिका–३, कप्तानगञ्जमा दुई समुदायबीच भएको विवादका क्रममा सशस्त्र प्रहरीले गोली चलाउँदा स्थानीय ओमप्रकाश मेहताको घटनास्थलमै मृत्यु भएको थियो। गोली लागेर घाइते भएका जयप्रकाश मेहताको भने बिहीबार उपचारका क्रममा मृत्यु भएको थियो।
दुवै जनाको शव हाल विराटनगरस्थित न्युरो अस्पतालको शवगृहमा राखिएको छ। सरकार र मृतक पक्षबीच बिहीबार राति सहमति भए पनि परिवारले शव नबुझेपछि पोस्टमार्टम प्रक्रिया अघि बढ्न सकेको छैन।
गृहमन्त्री सुधन गुरुङको उपस्थितिमा देवानगञ्ज गाउँपालिकाको कार्यालयमा भएको छलफलपछि सातबुँदे सहमति तयार भएको थियो। सहमतिपत्रमा गृहमन्त्री गुरुङले हस्ताक्षर गरेका थिए। त्यसपछि उनी स्वयं मृतकका परिवारको घरमा पुगेर सहमतिपत्रमा हस्ताक्षर गराएको बताइएको छ।
यसैबीच, घटनापछि तनावग्रस्त बनेको सुनसरीको अवस्था बुधबारदेखि क्रमशः सामान्य बन्दै गएको छ। यद्यपि, जिल्लामा लगाइएको कफ्र्यु भने अझै हटाइएको छैन।
