काठमाडौं । नेपाली कांग्रेसका सांसद आनन्दप्रसाद ढुंगानाले सुनसरीलगायत मधेसका विभिन्न जिल्लामा उत्पन्न धार्मिक तथा जातीय तनाव तत्काल समाधान गर्न सरकारको ध्यानाकर्षण गराउनुभएको छ ।
राष्ट्रिय सभाको शुक्रबारको बैठकमा बोल्दै सांसद ढुंगानाले सुनसरीको कप्तानगञ्जमा भएको घटनाप्रति सरकार गम्भीर बन्नुपर्ने बताउनुभयो । उहाँले गोली चलाउनुपर्ने अवस्था किन सिर्जना भयो भन्नेबारे सरकारले सदनलाई स्पष्ट जानकारी गराउनुपर्ने माग गर्नुभयो ।
सांसद ढुंगानाले गृहमन्त्री सुधन गुरुङले सुनसरीमा सातबुँदे सहमति गरेको जानकारी आफूले पाए पनि उक्त सहमति के उद्देश्यका लागि गरिएको हो भन्नेबारे सदनलाई जानकारी दिनुपर्ने बताउनुभयो ।
नेपाल बहुजातीय, बहुभाषिक र बहुधार्मिक मुलुक भएकाले जातीय तथा धार्मिक सद्भाव खल्बलिने घटनाप्रति सरकार गम्भीर हुनुपर्ने उहाँको भनाइ थियो । प्रधानमन्त्रीले स्वयं अग्रसरता लिएर उत्पन्न तनाव समाधान गर्नुपर्नेमा वक्तव्य जारी गरेर मात्रै पन्छिन खोजेको आरोपसमेत उहाँले लगाउनुभयो ।
उहाँले कप्तानगञ्जका ओमप्रकाश मेहता र जयप्रकाश मेहताको मृत्युको कारणबारे सरकारले सदनलाई जवाफ दिनुपर्ने माग गर्नुभयो । प्रहरीको बल प्रयोगका कारण उनीहरूको मृत्यु भएको हो वा अन्य कारणले भन्ने विषयमा सरकारले स्पष्ट पार्नुपर्ने उहाँको भनाइ थियो ।
‘सुनसरीलगायत देशका विभिन्न स्थानमा गोली चलेको छ । यस विषयमा गृहमन्त्रीले आज सदनमा आएर जवाफ दिनुहोला भन्ने आशा गरेका थियौँ । तर गृहमन्त्रीजी हुनुहुन्न,’ उहाँले भन्नुभयो, ‘हामीले जानकारी पाएअनुसार उहाँले सुनसरीमा सातबुँदे सहमति गर्नुभएको छ । तर त्यो वार्ता र सहमति के गर्नका लागि हो ? हामीलाई थाहा छैन ।’
उहाँले धार्मिक तथा जातीय तनावको अवस्था चार दिनसम्म रहँदा सरकार कहाँ थियो भन्ने प्रश्नसमेत गर्नुभयो । ‘देशमा धार्मिक आगो सल्किएको चार दिनसम्म सरकार कहाँ थियो, ठेगान छैन,’ उहाँले भन्नुभयो ।
सांसद ढुंगानाले प्रधानमन्त्रीले तत्काल अग्रसरता लिएर तनाव समाधान गर्नुपर्ने र पीडित परिवार तथा प्रभावित समुदायलाई न्यायको अनुभूति हुने गरी आवश्यक कदम चाल्नुपर्नेमा जोड दिनुभयो ।
