काठमाडौँ । सुनसरीको कप्तानगञ्जमा भएको हत्या प्रकरणलाई लिएर राष्ट्रिय सभामा सांसदहरूले सरकारको चर्को आलोचना गरेका छन् ।
शुक्रबार बसेको राष्ट्रिय सभा बैठकमा आकस्मिक समय लिएर बोल्दै सांसदहरूले सुनसरीसहित तराईका विभिन्न जिल्लामा उत्पन्न तनावबारे प्रधानमन्त्रीले सदनलाई जानकारी गराउनुपर्ने माग गरेका हुन् । उनीहरूले मधेसमा देखिएको धार्मिक तनावबारे सरकारको आधिकारिक धारणा संसद्मार्फत सार्वजनिक गर्न माग गर्दै प्रधानमन्त्रीलाई सदनमा जवाफ दिन रुलिङ गर्न राष्ट्रिय सभा अध्यक्षको ध्यानाकर्षण गराए ।
नेपाली कम्युनिष्ट पार्टी (नेकपा) की सांसद जयन्तीदेवी राईले कप्तानगञ्जमा ओमप्रकाश मेहताको हत्याले मुलुकलाई स्तब्ध बनाएको उल्लेख गर्दै संवेदनशील अवस्थामा प्रधानमन्त्री स्वयं सदनमा उपस्थित भएर घटनाको वास्तविकता र समग्र अवस्थाबारे जानकारी गराउनुपर्ने बताउनुभयो ।
उहाँले पछिल्लो घटनाक्रम झन् जटिल बन्दै गएको र यसले आन्तरिक द्वन्द्व, सामाजिक सद्भाव तथा धार्मिक सहिष्णुतामा गम्भीर असर पारिरहेको दाबी गर्नुभयो । सरकार संवेदनशील घटनाप्रति गम्भीर नदेखिएको आरोप लगाउँदै उहाँले सुनसरीमा गोली कसको आदेशमा र किन चलाइयो भन्ने विषयमा निष्पक्ष छानबिन गर्न माग गर्नुभयो ।
सांसद राईले तनाव सुरु भएकै बेला प्रधानमन्त्रीले राष्ट्रका नाममा सम्बोधन गरेको भए ठूलो क्षति रोक्न सकिने दाबी गर्दै सुरक्षा संयन्त्र कमजोर र विवादास्पद बन्दै गएकोप्रति समेत प्रश्न उठाउनुभयो ।
त्यस्तै, नेकपा (एमाले) की मुख्य सचेतक रोशनी मेचेले मधेसमा उत्पन्न समस्याको समाधान संवादमार्फत खोज्नुपर्नेमा सरकारले क्रुर र बर्बरताको बाटो रोजेको आरोप लगाउनुभयो । उहाँले सरकार नागरिकको सुरक्षा गर्न गएको हो कि गोली प्रहार गर्न भन्दै प्रश्न गर्नुभयो ।
सुनसरीसहित मधेस प्रदेशमा धार्मिक तनावको अवस्था उत्पन्न हुँदा सरकार मौन बसेको आरोप लगाउँदै सांसद मेचेले घटनाबारे सरकारले तत्काल स्पष्ट धारणा सार्वजनिक गर्नुपर्ने बताउनुभयो ।
सांसदहरूले सुनसरीलगायत मधेसमा भएका संवेदनशील घटनाको सत्यतथ्य छानबिन गरी दोषीमाथि कारबाही गर्न र सामाजिक सद्भाव कायम गर्न सरकारले तत्काल प्रभावकारी कदम चाल्नुपर्ने माग गरेका छन्।
