काठमाडौं । वि.सं २०४६ को जनआन्दोलनका कमाण्डर स्वर्गीय गणेशमान सिंहको शालिकमा माल्यार्पण गरिएको छ । स्व सिंहको २२औँ स्मृति दिवसका अवसरमा आज बिहान गणेशमान सिंह फाउण्डेशनको आयोजनामा शोभाभगवतीमा आयोजित कार्यक्रममा माल्यार्पण गरिएको हो ।
कार्यक्रममा नेपाली काङ्ग्रेसका नेता प्रकाशमान सिंहले नेपालको प्रजातान्त्रिक आन्दोलनमा स्व सिंहको महत्वपूर्ण भूमिका रहेको उल्लेख गर्नुभयो । “स्व सिंह सङ्घर्षशील, त्यागी, लौहपुरुष, प्रजातान्त्रिक आन्दोलनलाई सहज ढङ्गले नेतृत्व गर्नसक्ने नेता हुनुहुन्थ्यो,” उहाँले भन्नुभयो । पूर्वउपप्रधानमन्त्रीसमेत हुनुभएका नेता सिंहले मुलुकमा विवादित अवस्थामा रहेका कम्युनिष्टहरूलाई एक ठाउँमा ल्याउन स्व सिंहको उल्लेखनीय भूमिका रहेको जिकिर गर्नुभयो । दुई तिहाइको सरकारले जनताको भावना र मर्मअनुसार काम गर्न नसकेको आरोप लगाउनुभएका उहाँले नेपाली काङ्ग्रेस पनि संस्थागतरुपमा अगाडि बढ्न नसकेको बताउनुभयो ।
काङग्रेस केन्द्रीय सदस्य नवीन्द्रराज जोशीले स्व सिंहजस्तै सबैले व्यक्तिगत स्वार्थभन्दा मुलुकको स्वार्थलाई प्राथमिकतामा राखेमात्र देश विकास हुने बताउनुभयो । सोही दलका जिल्ला सभापति सबुज बानियाँले स्व नेता सिंहले देखाएको बाटोलाई पार्टीले पछ्याउन नसकेको गुनासो गर्नुभयो । सो अवसरमा विभिन्न जिल्लाका पार्टी सभापति, नेता तथा कार्यकर्ताले स्व सिंहको शालिकमा माल्यार्पण गरेका थिए ।
