काठमाडौं । नेपाली कांग्रेसका सभापति शेरबहादुर देउवाले बाँकेको खजुरामा भएको घटनमा सरकार र प्रहरी मुकदर्शक बनेको आरोप लगाएका छन् ।
प्रतिनिधिसभाको चालु अधिवेशनको अन्तिम दिन बिहीबार सदनलाई सम्बोधन गर्नेक्रम देउवाले यस्तो आरोप लगाएका हुन्।
‘के अब शान्तिपूर्ण कार्यक्रम गर्न नपाइने हो ?’, देउवाले प्रश्न गर्दै भने, ‘हाम्रा जिल्ला नेताको हात भाँचिएको छ। नेकपा कार्यकर्ताले आक्रमण गर्दा किन प्रहरी प्रशासन चुप बस्यो ? प्रहरी नेकपा वा कसैको कार्यकर्ता होइन। उसको काम शान्ति सुरक्षा गर्ने हो। तर त्यो किन भएन ?’
उनले जनताको करबाट तलब खाने प्रहरीले कार्यकर्ताको जस्तो व्यवहार गर्ने प्रवृत्तिको चर्को विरोध समेत गरेका छन्। ‘जनताको करबाट तलब बुझ्ने प्रहरीेले पार्टी कार्यकर्ताको जस्तो व्यवहार गर्न मिल्छ ,’, उनले भने, ‘यो प्रवृत्ति हामीलाई स्वीकार्य छैन।’
साथै देउवाले बजार मूल्य बढेकोप्रति सरकार गम्भीर नभएको भन्दै आपत्ति जनाएका छन्।
