काठमाडौं । पूर्वप्रधानमन्त्री एवं नेपाली कम्युनिष्ट पार्टीका संयोजक पुष्पकमल दाहालले मुलुकका जटिल समस्या समाधानका लागि अनुभवी नेता तथा विज्ञहरूको ज्ञान र अनुभवलाई सरकारले आत्मसात गर्नुपर्ने बताउनुभएको छ ।
प्रतिनिधि सभाको बिहीबारको बैठकलाई सम्बोधन गर्दै दाहालले देशका विभिन्न राजनीतिक उतारचढाव झेलेका तथा लोकतन्त्रका लागि लामो समय संघर्ष, जेलनेल, यातना र बलिदान भोगेका नेताहरूको अनुभव राष्ट्रको महत्वपूर्ण सम्पत्ति भएको बताउनुभयो ।
उहाँले सुशासन, सामाजिक न्याय र समृद्धिका लागि विगतका अनुभवबाट सिक्न सरकारलाई आग्रह गर्नुभयो । प्रधानमन्त्रीको कार्यशैलीप्रति प्रश्न उठाउँदै दाहालले ‘आफू मात्रै पर्याप्त छु’ भन्ने सोच र अहंकारबाट सरकार सञ्चालन भइरहेको भए त्यो मुलुकका लागि दुर्भाग्यपूर्ण हुने टिप्पणी गर्नुभयो ।
दाहालले भन्नुभयो, ‘नेपालमा विगतका अनेकौँ राजनीतिक उतारचढाव पार गरेका अनुभवी नेता, बुद्धिजीवी र विज्ञहरूको ठूलो पंक्ति छ । कठिन परिस्थितिमा देशलाई निकास दिने क्षमता भएका, सुशासन, सामाजिक न्याय र समृद्धिका लागि निरन्तर संघर्ष गरेका तथा लोकतन्त्रका लागि झन्डै ७० वर्षसम्म जेल, यातना र बलिदान सहेका नेताहरूको अनुभव हाम्रो सम्पत्ति हो ।’
उहाँले प्रधानमन्त्रीले अनुभवी नेताहरूसँग संवाद र सहकार्य गर्नुपर्ने बताउँदै आफूलाई पनि बोलाएर विगतमा भ्रष्टाचारविरुद्ध सुरु गरिएको अभियान र त्यसका चुनौतीबारे छलफल गर्न सकिने धारणा राख्नुभयो । ‘अनुभवबाट सिक्न किन हिचकिचाउनु ? यदि म आफैँ पर्याप्त छु, मलाई कसैको आवश्यकता छैन भन्ने अहंकारले यस्तो भइरहेको हो भने त्यो दुर्भाग्यपूर्ण हुनेछ,’ दाहालले भन्नुभयो ।
नेपाली कांग्रेस, नेकपा (एमाले) लगायतका राजनीतिक दलसँग लामो राजनीतिक संघर्ष र शासन सञ्चालनको अनुभव रहेको उल्लेख गर्दै उहाँले ती अनुभव वर्तमान सरकारका लागि मार्गदर्शक र सहयोगी बन्न सक्ने बताउनुभयो ।
प्रतिपक्षलाई अवमूल्यन गर्ने, अपमानित गर्ने तथा संवादबाट टाढा रहने प्रवृत्तिले अन्ततः राष्ट्र, जनता र सरकारलाई नै संकटमा पार्न सक्ने दाहालको चेतावनी थियो । उहाँले सरकारलाई सबै राजनीतिक दल, वर्ग, तह र समुदायलाई समेटेर उदारतापूर्वक अघि बढ्न सुझाव दिनुभयो ।
‘जति उदारतापूर्वक सहकार्य गर्न सकियो, त्यति नै देश, जनता र सरकारकै हित हुन्छ,’ दाहालले भन्नुभयो, ‘सरकार जति संवादबाट टाढा जान्छ, प्रतिपक्षलाई अवमूल्यन वा अपमानित गर्छ अथवा समाजका कुनै वर्ग, तह वा समुदायलाई बेवास्ता गर्छ, त्यति नै राष्ट्र, जनता र हामी सबै अप्ठ्यारोमा पर्न सक्छौँ ।’
