काठमाडाैँ । वीरगन्जस्थित नारायणी अस्पतालका चिकित्सकहरूले सामूहिक राजीनामा दिएका छन्। गत शनिबार अस्पतालमा भएको तोडफोड तथा चिकित्सकमाथि भएको कुटपिटको विरोधमा चिकित्सकहरूले सामूहिक राजीनामा दिएका हुन्।
चिकित्सकमाथि भएको कुटपिट र अस्पतालमा भएको तोडफोडको घटनामा दोषीमाथि कारबाही तथा सुरक्षाको माग गर्दै चिकित्सकहरू आन्दोलनमा उत्रिएका थिए। उनीहरूले पर्साका प्रमुख जिल्ला अधिकारी र जिल्ला प्रहरी प्रमुख (एसपी) को राजीनामा माग गरेका थिए।
आफ्ना माग पूरा नभएपछि चिकित्सकहरूले सामूहिक राजीनामा दिएका हुन्। उनीहरूले प्रमुख जिल्ला अधिकारी र एसपीको राजीनामा नआए देशभरका चिकित्सकले समेत सामूहिक राजीनामा दिने चेतावनी दिएका छन्।
अस्पतालमा कार्यरत बालरोग विशेषज्ञ डा. रामसुफल रामका अनुसार नारायणी अस्पतालमा कार्यरत ७० जना चिकित्सकमध्ये ३० जनाले सोमबार राति १० बजे नै अस्पतालका मेडिकल सुपरिन्टेन्डेन्ट डा. चित्तरञ्जन साहसमक्ष राजीनामा बुझाइसकेका छन्।
चिकित्सकहरूले अस्पतालमा सुरक्षित र भयमुक्त वातावरणमा काम गर्ने अवस्था सुनिश्चित गर्नुपर्ने मागसमेत राखेका छन्।
