अमेरिका: गैरआवासीय नेपाली सङ्घ (एनआरएनए) राष्ट्रिय समन्वय परिषद् अमेरिकाको नेपाली भाषा, साहित्य समितिको आयोजनामा २१३औँ भानु जयन्ती तथा १०३औँ धर्मराज थापा जयन्ती जुममार्फत भव्य रूपमा सम्पन्न भएको छ।
वरिष्ठ साहित्यकार राजेन्द्रप्रसाद अर्यालको सभापतित्वमा आयोजित कार्यक्रममा वरिष्ठ गायिका ज्ञानु राणा प्रमुख अतिथि तथा कवि मदनराज थापा विशेष अतिथिका रूपमा सहभागी हुनुभएको थियो। ज्ञानु राणा र मदनराज थापा स्वर्गीय जनकविकेशरी धर्मराज थापाका सुपुत्री र सुपुत्र हुन्।
कार्यक्रमको प्रारम्भमा समितिका उपाध्यक्ष एवं कवि कृष्ण गिरीले स्वागत मन्तव्यसँगै प्रमुख अतिथि ज्ञानु राणाको परिचय प्रस्तुत गर्नुभएको थियो। कार्यक्रममा अमेरिका र नेपालका विभिन्न स्थानबाट सहभागी साहित्यकारहरूले आदिकवि भानुभक्त आचार्य र जनकविकेशरी धर्मराज थापाको नेपाली भाषा, साहित्य, लोकसंस्कृति तथा गीत–सङ्गीतमा पुर्याएको योगदानको स्मरण गर्दै कविता, गीत तथा अन्य साहित्यिक रचनाहरू प्रस्तुत गरेका थिए।
प्रमुख अतिथि ज्ञानु राणाले आफ्नो सांगीतिक यात्राका अनुभव सुनाउँदै भानुभक्तका सिर्जनामा आधारित गीतसहित आफ्ना चर्चित गीतहरू प्रस्तुत गर्नुभएको थियो। कवि मदनराज थापाले भानुभक्त र आफ्ना पिता धर्मराज थापाको योगदानबारे चर्चा गर्दै धर्मराज–सावित्री थापा प्रतिष्ठानले नेपाली भाषा, साहित्य र लोकसंस्कृतिको संरक्षणमा गरिरहेका गतिविधिबारे जानकारी गराउनुभयो।
कार्यक्रममा एनआरएनए अमेरिकाका उपाध्यक्ष डा. गङ्गाधर आचार्य, प्राध्यापक रन्जुश्री पराजुली, तीर्थराज अधिकारी, विष्णा बिरही, डा. शम्भु कँडेल, जीवन निरौला, डमरु पौडेल, गायत्री तिमिल्सिना, पिपलमणि सिग्देल, डा. अमरबहादुर कार्की, डा. निरज श्रेष्ठ, डा. पवित्रा अर्याल, रामचन्द्र अधिकारी, डा. प्रशान्त घिमिरे, डा. छत्रपति दाहाल, सीता अर्याल, डा. रमेश पोख्रेल, डा. शरद पराशर मरहट्टालगायतका साहित्यकारहरूले आफ्ना सिर्जना वाचन गरेका थिए।
साहित्यकार प्रभा पोख्रेलले कार्यक्रम सञ्चालन गर्दै भानुभक्त र धर्मराज थापाका सिर्जनाहरू सुमधुर स्वरमा प्रस्तुत गर्नुभएको थियो। समापन मन्तव्यका क्रममा सभापति राजेन्द्रप्रसाद अर्यालले भानुभक्त र धर्मराज थापाले नेपाली भाषा, साहित्य, गीत–सङ्गीत र संस्कृतिको विकासमा पुर्याएको योगदानको चर्चा गर्दै धर्मराज–सावित्री थापा प्रतिष्ठानजस्ता संस्थालाई सरकारले आवश्यक आर्थिक सहयोग उपलब्ध गराउनुपर्ने धारणा व्यक्त गर्नुभयो।
कार्यक्रमको अन्त्यमा सभापति अर्यालले सहभागी सम्पूर्ण साहित्यकार, अतिथि तथा दर्शकप्रति धन्यवाद ज्ञापन गर्दै कार्यक्रम सम्पन्न भएको घोषणा गर्नुभयो।
