काठमाडौँ। नेपाली कम्युनिष्ट पार्टीका नेता नारायणकाजी श्रेष्ठले वर्तमान सरकारको कार्यशैलीले मुलुकको राष्ट्रियता, संविधान र लोकतन्त्रमाथि गम्भीर प्रहार गरिरहेको आरोप लगाउनुभएको छ ।
नरबहादुर कर्माचार्यको स्मृति दिवसका अवसरमा शनिवार काठमाडौंमा आयोजित कार्यक्रमलाई सम्बोधन गर्दै नेता श्रेष्ठले सरकारका पछिल्ला गतिविधिले नकारात्मक दिशा लिएको दाबी गर्नुभएको हो । श्रेष्ठले राष्ट्रिय सार्वभौमिकता र भौगोलिक अखण्डताका सवालमा सरकारले गम्भीर घात गरेको उल्लेख गर्नुभयो ।
नेपालले भारतको भूमि मिचेको भनी संसदमा दिइएका अभिव्यक्तिको रास्वपाका नेताहरूले समर्थन गरेको र त्यसलाई पुष्टि गर्न खोजेको भन्दै उहाँले आपत्ति जनाउनु भयो ।
नेपाली राजनीतिको इतिहासमा यसअघि कहिल्यै यस्तो प्रकृतिको राष्ट्रहित विपरित र समाजलाई विभाजित गर्ने काम नभएको उहाँको भनाइ छ ।
संविधान र लोकतन्त्रको रक्षाका सम्बन्धमा बोल्दै नेता श्रेष्ठले वर्तमान सरकार संविधानले परिकल्पना गरेको ‘समाजवाद उन्मुख’ राज्य र अर्थतन्त्रप्रति प्रतिवद्ध नरहेको आरोप लगाउनु भयो । संविधान संशोधनको विषयमा टिप्पणी गर्दै उहाँले संविधानको मूल मर्म र लोकतन्त्रको रक्षालाई केन्द्रमा राखेर मात्र संशोधन प्रक्रिया अघि बढाउनुपर्नेमा जोड दिनुभयो ।
लोकतन्त्रको हत्या गर्नेगरी ल्याइने संशोधनको विरुद्धमा उभिनुपर्ने उहाँको तर्क छ । नेता श्रेष्ठले सरकारले वाक् तथा संगठन स्वतन्त्रतामाथि अङ्कुश लगाउन खोजेको बताउनु भयो । शैक्षिक र प्राज्ञिक संस्थाहरूलाई दलीयकरणबाट मुक्त गर्ने बहानामा विद्यार्थी संगठन र ट्रेड युनियनहरूमाथि प्रतिवन्ध लगाउने प्रयास भइरहेको भन्दै उहाँले विरोध जनाउनु भयो ।
सरकारले एकातिर दलीयकरण मुक्त भन्ने तर अर्कोतिर आफ्ना पक्षका व्यक्तिहरूलाई महत्वपूर्ण संवैधानिक र न्यायिक निकायमा नियुक्ति दिने दोहोरो चरित्र देखाएको उहाँको आरोप छ ।
नेता श्रेष्ठले भन्नुभयो, ‘रास्वपाको नेतृत्वमा सरकार अघि बढिरहेको वर्तमान अवस्थाले राष्ट्रिय स्वाधीनता, संविधान, लोकतन्त्र र श्रमजीवी वर्गका अधिकारमाथि गम्भीर चुनौती सिर्जना गरेको देखिन्छ । राष्ट्रिय हितका विषयमा भ्रम फैलाउने, संविधानको समाजवादउन्मुख मूल भावना विपरीत नीति अघि सार्ने तथा संविधान संशोधनको नाममा यसको आधारभूत मर्म कमजोर बनाउने प्रयास भइरहेको आरोप छ । त्यसैगरी अभिव्यक्ति स्वतन्त्रता, विद्यार्थी संगठन र ट्रेड युनियनमाथि नियन्त्रण गर्ने प्रवृत्ति बढेको तथा सानो आलोचनामै मुद्दा र पक्राउको अभ्यास देखिएको बताइएको छ। सुकुम्बासीमाथि गरिएको बलपूर्वक हटाउने कार्य र अमानवीय व्यवहारप्रति पनि गम्भीर असन्तुष्टि व्यक्त गरिएको छ । यस परिस्थितिमा राष्ट्रिय स्वाधीनता, संविधान, लोकतन्त्र र गरिब–श्रमजीवी वर्गको अधिकारको रक्षाका लागि सशक्त रूपमा उभिनुपर्ने आवश्यकता औँल्याइएको छ । साथै, कम्युनिस्ट आन्दोलनले आत्मसमीक्षा गर्दै वैचारिक र संगठनात्मक रूपमा सुदृढ भएर यी चुनौतीको नेतृत्व गर्नुपर्ने धारणा व्यक्त गरिएको छ ।’
सुकुम्बासी समस्याका सन्दर्भमा बोल्दै श्रेष्ठले सरकारको कार्यशैली अमानवीय भएको बताउनु भयो । डोजर र सुरक्षाकर्मीको प्रयोग गरी सुकुम्बासीहरूलाई रातारात उठाइएको, होल्डिङ सेन्टरमा आधारभूत सुविधाबाट वञ्चित गरिएको र उनीहरूलाई अपमानजनक व्यवहार गरिएको भन्दै उहाँले सरकारको आलोचना गर्नुभयो
। नेता श्रेष्ठले श्रमजीवी र उत्पीडित वर्गमाथि अन्याय हुँदा कम्युनिष्ट पार्टी र तिनका भ्रातृ संगठनहरूले सशक्त प्रतिरोध गर्न नसक्नुमा वैचारिक र सांस्कृतिक स्खलन मुख्य कारण रहेको बताउनु भयो ।
राष्ट्रिय स्वाधीनता र लोकतन्त्रमाथि आइलागेको संकट टार्न कम्युनिष्टहरूले आफूलाई सुधार गर्दै नेतृत्वदायी भुमिका खेल्नुपर्नेमा उहाँले जोड दिनुभयो । –न्युज एजेन्सी नेपाल
