काठमाडौँ । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले प्रतिक्रान्तिको खतरा अझै टरिनसकेको भन्दै त्यसको प्रतिवाद गर्न वामपन्थी शक्तिहरूबीच साझा न्यूनतम कार्यक्रम आवश्यक रहेको बताएका छन् ।
४८औँ पुष्पलाल स्मृति दिवसका अवसरमा पुष्पलाल मित्रता केन्द्रले शुक्रबार काठमाडौँमा आयोजना गरेको ‘वर्तमान राजनीतिक परिस्थितिमा वामपन्थीहरूको भूमिका’ विषयक विचार गोष्ठीमा बोल्दै प्रचण्डले राष्ट्रिय स्वाधीनता, संविधान र गणतन्त्रको रक्षाका लागि वामपन्थी शक्तिहरू एकजुट भएर अघि बढ्नुपर्ने बताए ।
उनले साझा कार्यक्रम बनाएर आन्दोलन अघि बढाउन सके ठूलो जनसमर्थन जुटाउन सकिने दाबी गरे । उनका अनुसार काठमाडौँमा पाँचदेखि सात लाख र देशभरका जिल्लामा एकदेखि डेढ लाख मानिस परिचालन गर्न सके एकै दिनमा आन्दोलन सफल पार्न सकिन्छ ।
प्रचण्डले विगतकै शैलीमा फेरि सरकार गठनको खेलमा लागे वामपन्थी शक्तिहरूलाई ठूलो क्षति पुग्न सक्ने चेतावनीसमेत दिए । ‘हामी सबैले त्यतातिर सोच्नुपर्छ, नत्र बर्बाद हुन्छ,’ उनले भने, ‘फेरि पहिलाजस्तै सरकार बनाउने खेलमा लाग्यौँ भने अर्को प्रतिक्रान्तिका क्रममा हामी सबै उठ्नै नसक्ने गरी थचारिन सक्छौँ ।’
उनले तत्काल पार्टी एकताको विषयलाई प्राथमिकतामा राख्नुभन्दा साझा मुद्दामा सहकार्य गर्नुपर्ने धारणा राखे । पार्टी एकताका लागि हतार गर्दा आन्तरिक विवाद बढ्न सक्ने भन्दै उनले पर्याप्त समीक्षा नगरी एकता गरेर पछि पछुताउने अवस्था सिर्जना गर्न नहुने बताए ।
‘अहिले एउटै पार्टी बनाउन थालियो भने हाम्रो झगडा सुरु भइहाल्छ,’ प्रचण्डले भने, ‘समीक्षा नगरी पार्टी एकता गरेर फुर्सदमा पछुताउनु हुँदैन । तर सहकार्य आजै गर्न सम्भव छ ।’
