काठमाडौँ । अविरल वर्षाका कारण बढ्दो जोखिमलाई मध्यनजर गर्दै शनिबार राति १० बजेदेखि अर्को सूचना जारी नभएसम्म नारायणगढ–मुग्लिन–काठमाडौं सडकखण्डमा सबै प्रकारका सवारीसाधन सञ्चालनमा रोक लगाइएको छ।
प्रमुख जिल्ला अधिकारी गणेश अर्यालद्वारा जारी सूचनाअनुसार धादिङसहित छिमेकी जिल्लाहरू तथा चितवनका विभिन्न स्थानमा वर्षा भइरहेको र रातिको समयमा सवारी सञ्चालन गर्दा दुर्घटना तथा अन्य जोखिम बढ्न सक्ने भएकाले अर्को सूचना जारी नभएसम्म उक्त सडकखण्डमा सवारी आवागमन बन्द गर्ने निर्णय गरिएको हो।
जिल्ला प्रशासनले आवश्यक सूचना, सहयोग, समन्वय तथा सहजीकरणका लागि नेपाल प्रहरी (१००), सशस्त्र प्रहरी बल (१११४), जिल्ला आपत्कालीन सञ्चालन केन्द्र (१२३४) तथा जिल्ला प्रहरी कार्यालय चितवनका सूचना अधिकारीको मोबाइल नम्बर ९८५५०१३९९९ मा सम्पर्क गर्न आग्रह गरेको छ।
