महेन्द्रनगर। कञ्चनपुरका स्थानीय पालिकाहरूले विपद्का बेला उद्धार तथा सम्भावित क्षति न्यूनीकरणका लागि सशस्त्र प्रहरी बललाई विपद् सामग्री हस्तान्तरणलाई प्राथमिकता दिएका छन् ।
शुक्रबार कञ्चनपुरको जेठो भीमदत्त नगरपालिकाले पनि सशस्त्र प्रहरी बल नंं ३५ शैलेश्वरी गणलाई रवर बोट, लाइफ ज्याकेट पाँच थान, १० थान हेलमेटलगायतका विपद् सामग्री हस्तान्तरण गरेको छ ।
भीमदत्त नगरपालिकाका उपप्रमुख निलम लेखकले विपद् कार्यमा सहजताका लागि सशस्त्र प्रहरी बललाई विपद् सामग्री हस्तान्तरण गरिएको बताउनुभयो । सशस्त्र प्रहरी बल नं ३५ शैलेश्वरी गणका गणपति प्रेमप्रकाश सिग्देलले पालिकाहरूले उपलब्ध गराएको विपद् सामग्री उद्धार, खोज तथा विपद् क्षति न्यूनीकरणका लागि सहज हुने बताउनुभयो ।
“विपद् हुने सम्भावित क्षेत्रको पहिचान गरी सोहीअनुसार सम्भावित विपद्सित जुध्न सशस्त्र प्रहरी बलले आवश्यक तयारी गरेको छ”, गणपति सिग्देलले भन्नुभयो, “यहाँ बर्खाका बेला बढीजसो डुबान र कटानको समस्या हुने गरेकाले सोही अनुरुप विपद्का लागि सशस्त्रको छुट्टै टोली तयारी अवस्थामा राखिएको छ ।”
यसअघि बिहीबार यहाँको दोधारा चादँनी नगरपालिकाले पनि सशस्त्र प्रहरीको सीमा सुरक्षा गुल्म देवीस्थानको टोली रबर बोट सेट, लाइफ ज्याकेटलगायतका सामग्री हस्तान्तरण गरेको थियो ।
शैलेश्वरी गणका गणपति सशस्त्र प्रहरी उपरीक्षक सिग्देलले कञ्चनपुरमा सम्भावित विपद्लाई मध्यनजर गर्दै विपद् व्यवस्थापन तालिमप्राप्त टिम परिचालन गरिएको बताउनुयभो ।
“गण, गुल्म र बिओपीहरूमा विपद् तालिमप्राप्त जनशक्ति तत्काल परिचालन हुनसक्ने गरी राखिएको छ”, उहाँले भन्नुभयो, “पालिकाहरूले विपद् सामग्री उपलब्ध गराउँदा हामीलाई विपद्का बेला खटिन निकै सहजता मिल्ने भयो ।”
नौवटा पालिका रहेको कञ्चनपुरमा एक साताअघि बेलौरी नगरपालिकाले पनि सशस्त्र प्रहरी बललाई विपद् उद्धार सामग्री हस्तान्तरण गरेको थियो ।
यहाँ भीमदत्त, दोधारा चादँनी, बेलौरी, पुनर्वास, लालझाडी गाउँपालिका वर्षातका बेला आउने बाढीबाट बढी प्रताडित हुने गरेका छन् । यहाँ महाकाली नदी, चौधर नदी, दोदा नदी तथा विभिन्न खोला तथा खहरे खोलामा जलस्तर बढ्दा डुबानको समस्या हुने गरेको छ । रासस
