काठमाडाैँ। वीर अस्पतालको बर्न युनिटमा उपचारका क्रममा मृत्यु भएका मुगुको सोरु गाउँपालिका–१ जवलधाराका २५ वर्षीय गणेश नेपालीको मृत्यु प्रकरणमा नेपाल सरकार, काठमाडौं महानगरपालिका र पीडित पक्षबीच ९ बुँदे सहमति भएको छ।
जिल्ला प्रशासन कार्यालय काठमाडौंमा प्रमुख जिल्ला अधिकारी ईश्वरराज पौडेलको उपस्थितिमा आइतबार भएको वार्तापछि सहमतिपत्रमा हस्ताक्षर गरिएको हो। सहमतिसँगै सरकारले घटनाको निष्पक्ष छानबिन, पीडित परिवारलाई राहत तथा सामाजिक सुरक्षासम्बन्धी विभिन्न व्यवस्था गर्ने प्रतिबद्धता जनाएको छ।
सहमतिअनुसार घटनाको सत्यतथ्य पत्ता लगाउन नेपाल सरकारले पूर्वन्यायाधीशको संयोजकत्वमा यथाशीघ्र स्वतन्त्र छानबिन समिति गठन गर्नेछ। समितिले गठन भएको सात दिनभित्र प्रतिवेदन सरकारसमक्ष बुझाउनेछ।
त्यस्तै, गणेश नेपालीलाई सहिद घोषणा गर्ने विषयमा प्रचलित कानुन, विगतको अभ्यास तथा छानबिन समितिको प्रतिवेदन र सिफारिसका आधारमा आवश्यक निर्णय प्रक्रिया अघि बढाइने सहमति भएको छ।
घटना भएको दिन फिल्डमा अग्रभागमा खटिएका काठमाडौं महानगरपालिकाका नगर प्रहरी कर्मचारीलाई छानबिन प्रतिवेदनका आधारमा थप निर्णय हुने गरी तत्कालका लागि निलम्बन गर्न जिल्ला प्रशासन कार्यालयले काठमाडौं महानगरपालिकालाई पत्राचार गर्ने सहमति भएको छ।
सहमतिअनुसार काठमाडौं महानगरपालिकाले आगामी कार्यपालिका बैठकबाट निर्णय गराई मृतककी श्रीमतीलाई योग्यता र क्षमताअनुसार रोजगारी उपलब्ध गराउनेछ। साथै, मृतककी छोरीको उच्च शिक्षासम्मको सम्पूर्ण खर्च महानगरपालिकाले व्यहोर्नेछ भने आवश्यक समन्वय नेपाल सरकारका सम्बन्धित निकायले गर्नेछन्।
यसैगरी, मृतकको आश्रित परिवारलाई राहतस्वरूप उचित रकम उपलब्ध गराइने, अन्त्येष्टि तथा काठमाडौंमा गरिने काजक्रियाको सम्पूर्ण व्यवस्थापन महानगरपालिकाले गर्ने, परिवारजनको काठमाडौं आउजाउ तथा बसोबास खर्चसमेत महानगरपालिकाले व्यहोर्ने सहमति भएको छ।
पीडित परिवारले शव बुझ्ने, पोस्टमार्टमसहितका कानुनी प्रक्रियामा पूर्ण सहयोग गर्ने जिम्मेवारी लिएको छ। साथै, मृतकका एकाघरका परिवारको स्वास्थ्य बीमाको व्यवस्था स्वास्थ्य तथा खाद्य स्वच्छता मन्त्रालयमार्फत गरिने सहमतिमा उल्लेख छ।
सहमतिपत्रमा नेपाल सरकार तथा काठमाडौं महानगरपालिकाका तर्फबाट प्रमुख जिल्ला अधिकारी ईश्वरराज पौडेल र काठमाडौं महानगरपालिकाका प्रमुख प्रशासकीय अधिकृत सरोज गुरागाईंले हस्ताक्षर गरेका छन्। पीडित परिवारका तर्फबाट मृतककी श्रीमती एकमाया नेपाली, बुवा चिने नेपाली, आमा सौरी नेपाली, दाजु मदन नेपाली, बहिनी सुन्दरी नेपाली तथा वार्ता समितिका सदस्यहरूले हस्ताक्षर गरेका छन्।
