काठमाडौं । नेपाल पत्रकार महासंघका पूर्वअध्यक्ष हरिहर विरहीले संविधानले पूर्ण प्रेस स्वतन्त्रताको सुनिश्चितता गरे पनि सञ्चार क्षेत्रमा चुनौतीहरू अझै कायम रहेको बताउनुभएको छ।
नेपाल पत्रकार महासंघले आइतबार ललितपुरमा आयोजना गरेको ‘बदलिँदो परिस्थितिमा प्रेस स्वतन्त्रता : सञ्चार कानून र जिम्मेवार पत्रकारिता’ विषयक कार्यक्रममा बोल्दै उहाँले नेपालको प्रेस जगतले जुनसुकै परिस्थितिमा पनि आफ्नो कर्तव्य निर्वाह गर्न ठूलो मूल्य चुकाउँदै आएको बताउनुभयो।
उहाँले लोकतान्त्रिक व्यवस्था स्थापना र परिवर्तनका आन्दोलनमा प्रेस जगतले अग्रणी भूमिका खेलेको स्मरण गर्दै संविधानले प्रेस स्वतन्त्रताको प्रत्याभूति गरिसक्दा पनि पत्रकारहरू आधारभूत आवश्यकता पूरा गर्न नसक्ने अवस्थामा पुग्नु दुःखद् भएको उल्लेख गर्नुभयो।
विरहीले राज्यमा सूचना लुकाउने प्रवृत्ति अझै कायम रहेको र सही सूचनालाई समेत गलत सावित गर्ने प्रयास भइरहेका कारण पत्रकारिता थप चुनौतीपूर्ण बन्दै गएको बताउनुभयो। यस्ता गतिविधिको अनुभूति पत्रकार मात्र होइन, पाठक, श्रोता र दर्शकले समेत गरिरहेको उहाँको भनाइ थियो।
उहाँले प्रमाणसहित प्रकाशित गरिएको मन्त्रीसम्बन्धी समाचारलाई सञ्चार संस्थाकै सञ्चालकले सार्वजनिक रूपमा खण्डन गर्दै माफी माग्नुपर्ने अवस्था सिर्जना हुनु प्रेस स्वतन्त्रतामाथिको दबाबको उदाहरण भएको उल्लेख गर्नुभयो। यस्तो अवस्था यसअघि कहिल्यै नदेखिएको भन्दै उहाँले यसप्रति गम्भीर ध्यान दिनुपर्ने आवश्यकता औंल्याउनुभयो।
