काठमाडौं । राष्ट्रिय स्वतन्त्र पार्टी (रास्वपा) का पहिलो महाधिवेशनबाट निर्वाचित पदाधिकारी तथा केन्द्रीय सदस्यहरूको शपथ ग्रहण कार्यक्रम आज पार्टी केन्द्रीय कार्यालय वनस्थलीमा आयोजना हुँदैछ।
शपथ ग्रहणका लागि नवनिर्वाचित पदाधिकारी र केन्द्रीय सदस्यहरू पार्टी कार्यालयमा उपस्थित हुन थालेका छन् भने अधिकांश नेताहरू कार्यक्रमस्थल पुगिसकेका छन्।
रास्वपाको पहिलो महाधिवेशन असार ७ गतेदेखि सुरु भएको थियो। प्रारम्भिक रूपमा तीन दिनभित्र सम्पन्न गर्ने योजना रहे पनि नेतृत्व चयनमा सहमति जुटाउने प्रयासका कारण महाधिवेशन ६ दिनसम्म लम्बिएको थियो।
महाधिवेशनबाट ९९ जना केन्द्रीय सदस्य निर्वाचित भएका छन्। पार्टीको विधानअनुसार बाँकी ५१ जना केन्द्रीय सदस्य भने सभापतिले मनोनयन गर्ने व्यवस्था रहेको छ।
