काठमाडौं । चितवनमा जारी राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनअन्तर्गत निर्वाचन प्रक्रिया आजैबाट सुरु हुने भएको छ।
हिजो नै सुरु गर्ने कार्यतालिका रहे पनि विभिन्न प्राविधिक तथा व्यवस्थापकीय कारणले बन्द सत्र आज ढिलो गरी सुरु भएको हो। बन्द सत्र सुरु भएसँगै निर्वाचन प्रक्रियालाई पनि अघि बढाउने तयारी गरिएको केन्द्रीय निर्वाचन आयोग स्रोतले जनाएको छ।
‘केही ढिलो हुन सक्छ, तर निर्वाचन प्रक्रिया आजैबाट सुरु हुन्छ,’ आयोग स्रोतले जनाएको छ।
महाधिवेशनअन्तर्गत पार्टी सभापतिमा रवि लामिछाने लाई निर्विरोध निर्वाचित गराउने तयारी भइरहेको बताइएको छ। यद्यपि केन्द्रीय समितिका ९९ सदस्य पदका लागि भने निर्वाचन हुने भएको छ।
रास्वपाको पहिलो महाधिवेशनमा नयाँ नेतृत्व चयनसँगै पार्टीको भावी राजनीतिक दिशा र संगठनात्मक संरचनाबारे समेत महत्वपूर्ण निर्णय हुने अपेक्षा गरिएको छ।
