बागमती। मकवानपुरको हेटौँडा उपमहानगरपालिकामा यस वर्ष संस्थागत विद्यालयको कक्षा ११ मा अध्ययन गर्ने २२२ जना विद्यार्थीले छात्रवृत्ति पाउने भएका छन् ।
उपमहानगरपालिकाले संस्थागत विद्यालयको कक्षा ११ मा पढ्ने विद्यार्थीलाई छात्रवृत्तिका लागि आवेदन आह्वान गरेकामा ८९६ जना विद्यार्थीको आवेदन परेको शिक्षा विकास महाशाखा प्रमुख हरिश्चन्द्र सापकोटाले जानकारी दिनुभयो ।
आवेदन दिएका विद्यार्थीका लागि छात्रवृत्तिको परीक्षा सञ्चालन गरी संस्थागत विद्यालय छात्रवृत्ति व्यवस्थापन कार्यविधि, २०८३ अनुसार २२२ जनालाई सिफारिस गरिएको उहाँले बताउनुभयो ।
सिफारिस गरिएकामध्ये १०४ जना मकवानपुर जिल्ला बाहिरका विद्यार्थीहरू रहेका शिक्षा महाशाखाले जनाएको छ ।
संस्थागत विद्यालयले विद्यार्थी सङ्ख्याका आधारमा १० देखि १५ प्रतिशतसम्म छात्रवृत्ति उपलब्ध गराउनुपर्ने कानुनी व्यवस्था रहेको छ । रासस
