काठमाडौँ । विद्युतीय राहदानी (ई–पासपोर्ट) छपाइ ठेक्का प्रक्रियामा अनियमितता भएको आरोपमा अख्तियार दुरुपयोग अनुसन्धान आयोगले तत्कालीन परराष्ट्रमन्त्री आरजु राणा देउवासहित १८ जनाविरुद्ध मुद्दा चलाउने निर्णय गरेको छ।
आयोगले आजै विशेष अदालतमा मुद्दा दर्ता गर्ने तयारी गरेको छ। अख्तियारको टोली मिसिल तथा आरोपीहरूलाई लिएर विशेष अदालत पुगेको स्रोतले जनाएको छ।
सरकारको विशेष चासोपछि तीव्र रूपमा अनुसन्धान अगाडि बढाइएको उक्त प्रकरणमा परराष्ट्र मन्त्रालयका २० भन्दा बढी कर्मचारीको नाम अनुसन्धानको दायरामा परेको छ।
यसअघि अख्तियारले राहदानी विभागका महानिर्देशक तीर्थराज अर्यालसहित चार जनालाई नियन्त्रणमा लिएर थुनामै राखी अनुसन्धान गरिरहेको छ।
ई–पासपोर्ट छपाइका लागि गरिएको ठेक्का प्रक्रियामा कानुनविपरीत निर्णय तथा आर्थिक अनियमितता भएको निष्कर्षसहित अख्तियारले विस्तृत अनुसन्धानपछि मुद्दा दायर गर्ने तयारी गरेको हो। विशेष अदालतमा मुद्दा दर्तापछि आरोपपत्रका थप विवरण सार्वजनिक हुने अपेक्षा गरिएको छ।
