काठमाडौं । उपराष्ट्रपति रामसहाय प्रसाद यादवज्यूसँग नेपालका लागि श्रीलंकाली महामहिम राजदूत रुवान्थी डेल्पिटियाले सोमबार लैनचौरस्थित उपराष्ट्रपतिको कार्यालयमा शिष्टाचार भेटवार्ता गर्नुभएको छ ।
भेटमा शुभकामना आदानप्रदान पश्चात् नेपाल–श्रीलंका सम्बन्धका विविध आयामबारे संवाद भएको थियो । उपराष्ट्रपति यादवले नेपाल र श्रीलंकाबीचको सम्बन्ध मित्रता, सद्भाव, आपसी समझदारी र सहयोगमा आधारित रही सन् १९५७ जुलाईमा कूटनीतिक सम्बन्ध स्थापना भएदेखि निरन्तर विस्तार हुँदै आएको उल्लेख गर्नुभयो ।
उहाँले दुई देशबीचको सांस्कृतिक तथा धार्मिक सम्बन्ध, जनस्तरबीचको आपसी सम्बन्ध तथा बुद्ध धर्मसँगको ऐतिहासिक सम्बन्धले द्विपक्षीय सम्बन्धलाई अझ प्रगाढ बनाएको बताउनुभयो । उहाँले भन्नुभयो, ‘लुम्बिनीलाई ‘विश्व शान्तिको मुहान’का रूपमा विकास गर्न श्रीलंका सरकारले पुर्याएको योगदानप्रति नेपालले प्रशंसा गर्दछ । ’
उपराष्ट्रपति यादवले श्रीलंकाली तीर्थालुहरूका लागि लुम्बिनी पवित्र स्थल रहेको र काठमाडौं–कोलम्बो सिधा उडानले भ्रमणलाई सहज बनाएको उल्लेख गर्नुभयो । हालै सञ्चालनमा आएको गौतम बुद्ध अन्तर्राष्ट्रिय विमानस्थलमार्फत् कोलम्बो–भैरहवा सिधा उडानले श्रीलंकाली पर्यटकलाई लुम्बिनी भ्रमणमा थप प्रोत्साहन दिने विश्वास समेत उहाँले व्यक्त गर्नुभयो ।
नेपालले श्रीलंकाली पर्यटकलाई निःशुल्क पर्यटक भिसा सुविधा दिँदै आएको र श्रीलंका सरकारले पनि नेपाली नागरिकलाई निःशुल्क पर्यटक भिसा सुविधा प्रदान गर्ने निर्णय गरेकोमा उपराष्ट्रपति यादवले खुशी व्यक्त गर्नुभयो । उहाँले यसले पर्यटक प्रवाह बढाउने, जनस्तरबीचको सम्बन्धलाई बलियो बनाउने तथा मित्रतालाई अझ प्रगाढ बनाउने विश्वास व्यक्त गर्नुभयो ।
नेपालले श्रीलंकासँगको सम्बन्धलाई सधैं उच्च महत्व दिने उल्लेख गर्दै उपराष्ट्रपति यादव भन्नुभयो, ‘करिब सात दशकदेखि रहँदै आएको सम्बन्ध पारस्परिक सम्मान, मित्रता र साझा संस्कृतिमा आधारित रही आजका दिनमा अझ प्रगाढ बनेको र आगामी दिनमा थप सुदृढ हुने विश्वास व्यक्त गर्दछु ।’
श्रीलंकाली महामहिम राजदूत रुवान्थी डेल्पिटियाले दुई राष्ट्रबीचको ऐतिहासिक र मैत्रीपूर्ण सम्बन्ध रहेको उल्लेख गर्दै नेपाल र श्रीलंका व्यापार, पर्यटन लगायतका क्षेत्रमा थप सहकार्य गर्न सक्ने बताउनुभयो ।
उहाँले पर्यटनको विकासका लागि ‘टूरिज्म स्कूल’को स्थापना गरी दुई देशका विद्यार्थीलाई ‘इन्टर्नसिप’मा पठाउन सकिने सम्भावनाबारे जानकारी दिनुभयो ।
