काठमाडौं । उपत्यकाको फोहोर घरघरबाट उठाएर सिधै डम्पिङ साईट पुर्याउन सुरु गरिएको छ । यसअघि टेकुस्थित ट्रान्सफर स्टेशनमा फोहोर जम्मा गरि डम्पिङ साईट रहेको नुवाकोटको सिस्डोलमा पुर्याउने गरिएको थियो । फोहोर सिधै ट्रान्सफर स्टेशन पुर्याईने भएपछि टेकुमा सञ्चालित ३९ रोपनी क्षेत्रफलमा फैलिएको ट्रान्सफर स्टेशन फोहोर स्टेशनलाई खालि गराई फोहोर शुन्य बनाईएको छ ।
सोमबारबाट जम्मा भएका फोहोरलाई उठाएर सिधै डम्पिङ साईट पुग्न थालेको काठमाडौं महानगरपालिकाले जनाएको छ । यससँगै साविकको ट्रान्सफर स्टेसनमा हरियाली बगैंचा बनाईने भएको छ । महानगरका प्रमुख प्रशासकीय अधिकृत केदार न्यौपानेसहित वातावरण व्यवस्थापन बिभागका अधिकारीहरुको उपस्थितिमा स्टेशनको बाँकी रहेको करीब ३ मेट्रिक टन फोहोर उठाईएको छ । फोहोर उठाइसकेपछि पानीले स्टेशनको सफाइ गरिएको छ ।
स्टेशन फोहोर शुन्य भइसकेपछि प्रशासकीय अधिकृत न्यौपानेले अबदेखि ट्रान्सफर स्टेशनमा फोहोर जम्मा गरेर नराखिने प्रतिवद्धता व्यक्त गरेका छन । ‘ट्रान्सफर स्टेशन नमिलेको फोहोर मिलाउने ठाउँ मात्रै हो । अब यसको प्रयोग त्यही अनुरुप हुनेछ । प्राबिधिक समस्याका समयमा बाहेक ट्रान्सफर स्टेशनमा फोहोर थुप्रिन दिईनेछैन।’ उनले भने । महानगरपालिकाले यसअघि समेत २०७२ भदौ २२ मा ट्रान्सफर स्टेशनलाई फोहोर शुन्य बनाइएको थियो ।
तर,फोहार नथुपार्ने प्रयास भने सफल हुन सकेन । वातावरण व्यवस्थापन बिभागका प्रमुख हरिकुमार स्टेशनलाई सफा रुपमै राख्न प्रयास गरिने बताँउछन । यसअघि उपत्यकाका सडक र गल्ली—गल्लीमा पुगेर फोहोर जम्मा गरेपछि ट्रान्सफर स्टेशनमा ल्याइन्छ । संकलित फोहोरलाई ठूला सवारी साधनबाट स्यानिटरी ल्याण्डफिल साइटमा ढुवानी गर्ने गरिएको थियो । यस्तो अबश्थामा कुनै एक ठाउँमा समस्या आएमा त्यसको चाप सिधै ट्रान्सफर स्टेशनमा पर्ने गर्दथ्यो ।
महानगरका अधिकारीहरु फोहोर उत्पादन देखि अन्तिम व्यवस्थापन गर्ने प्रणालीमा सबै जिम्मेवार भए मात्र यो प्रयास सफल हुने बताँउछन । विज्ञहरु फोहोर व्यवस्थापनमा प्रविधियुक्त बिधिहरु स्थापित भइसकेकोल फोहार व्यवस्थापनमा उन्नत प्रविधि प्रयोग गर्नुपर्ने बताँउछन । उनीहरु प्रबिधिका साथै फोहारका श्रोत घटाउन सके फोहोर व्यवस्थापनको सबैभन्दा उत्तम बिधि हुने बताँउछन । उनीहरु फोहोरको पुनःप्रयोग र पुनःचक्रीय प्रयोगबाट व्यववस्थित गर्न सकिने सुझाव दिन्छन । राजधानी दैनिकबाट
