काठमाडाैँ । चितवनका होटल व्यवसायीहरूले राष्ट्रिय स्वतन्त्र पार्टी (रास्वपा) को प्रथम केन्द्रीय महाधिवेशनमा आउने प्रतिनिधि तथा पर्यवेक्षक पाहुनाको स्वागत र सुविधामा कुनै कमी हुन नदिने प्रतिबद्धता जनाएका छन्।
आगामी असार ७ देखि ९ गतेसम्म भरतपुरमा हुने महाधिवेशनमा सहभागी हुने अतिथिहरूको आवास, खाना तथा पेयपदार्थमा विशेष छुटसहितको व्यवस्था गरिएको होटल व्यवसायीहरूले बताएका छन्।
होटल व्यवसायी संघ चितवनका अध्यक्ष ऋषिकेश अर्यालका अनुसार महाधिवेशनमा आउने पाहुनाका लागि आवासमा २५ प्रतिशत तथा खाना र पेयपदार्थमा १० प्रतिशत छुटको व्यवस्था मिलाइएको छ। भरतपुर महानगरपालिका र गैँडाकोट क्षेत्रका होटल तथा रेष्टुरेन्टहरूमा यो सुविधा लागू हुने उनले जानकारी दिए।
सङ्घका अनुसार छुट व्यवस्था प्रभावकारी रूपमा कार्यान्वयन भए–नभएको अनुगमन गर्न विशेष समिति पनि गठन गरिएको छ। क्षेत्रीय होटल संघ चितवनका अध्यक्ष ओमप्रकाश पाण्डेका अनुसार उक्त संघअन्तर्गत करिब ९० होटलहरू रहेका छन्, जसको समग्र क्षमता करिब १० हजार पाहुना अट्ने छ। संघमा ६७१ सदस्य आबद्ध छन् भने चिया पसलदेखि रेष्टुरेन्ट तथा होटलहरू समेटिएकाले यकिन क्षमता भने निश्चित गर्न कठिन हुने उनले बताए।
महाधिवेशनका लागि गठित आवास तथा भोजन उपसमितिका संयोजक राजन गौतमका अनुसार चितवनका होटलहरूमा रास्वपाका प्रतिनिधि तथा पर्यवेक्षकका लागि तीन हजारभन्दा बढी कोठा तयारी अवस्थामा रहेका छन्।
उनका अनुसार महाधिवेशनमा सहभागी हुने प्रतिनिधिहरूले आवास खर्च भने आफैँ व्यहोर्ने व्यवस्था गरिएको छ।
