काठमाडाैँ । बागमती विश्वविद्यालय विभिन्न नयाँ कार्यक्रमका साथ विद्यार्थीे र अभिभावकलाई आकर्षित गर्दै अघि बढिरहेको छ । विश्वविद्यालयले एक वर्षयता व्यवस्थापन र कानुन, विज्ञान तथा प्रविधि, शिक्षा तथा सामाजिक विज्ञान सङ्कायमा स्नातक तहको कक्षा सञ्चालन गरिरहेको छ ।
युगको मागअनुुसारका विषय एवं पाठ्यक्रममा जोड दिइएको विश्वविद्यालय संरक्षक समिति (बोर्ड अफ ट्रष्टिज)का अध्यक्ष प्रा डा चन्द्रमणि पौडेलले जानकारी दिनुुभयो । उहाँका अनुुसार विश्वविद्यालयले हालसम्म विभिन्न विषयका १४ वटा पाठ्यक्रम तयार गरिसकेको छ भने यस वर्षदेखि स्नातकोत्तर तहका कक्षासमेत सञ्चालन गर्नेछ ।
संविधानतः उच्च शिक्षालाई प्रदेश तहमा जिम्मेवारी दिएअनुरुप २०८१ साल जेठ २५ गते उक्त विश्वविद्यालय स्थापना भएको थियो । अध्यक्ष पौडेलले भन्नुुभयो, “यसै वर्षदेखि स्नातकोत्तर तहमा एमएड, एमबिए र मास्टर इन इन्सुरेन्स एन्ड रिस्क म्यानेजमेन्ट (एमआरआइएम)का कक्षा सञ्चालन गर्दैछौँ भने स्नातक तहमा कम्युटर इन्जिनियरिङ, बिएएलएलबी, बिएचएमजस्ता विषय थप्न लागेका छौँ ।”
विश्वविद्यालयअन्तर्गत आङ्गिक क्याम्पसका रूपमा माडी क्याम्पस चितवन, हेटौँडा क्याम्पस मकवानपुर, जनमैत्री क्याम्पस काठमाडौँ, भुवानीशङ्कर क्याम्पस चितवन, चैतन्य क्याम्पस काभ्रेपलाञ्चोक र कपन क्याम्पस काठमाडौँ रहेका छन् । विश्वविद्यालयका सबै गरी आङ्गिक क्याम्पसमा हाल ५५० जना विद्यार्थी अध्ययनरत छन् ।
