काठमाडौं । लिटिल मास्टर एण्ड मिस इटहरी सिजन–२ को सिनियरतर्फ लिटिल मास्टरको उपाधि हर्षिल आचार्य र लिटिल मिसको उपाधि युनिशा निरौलाले जितेका छन्। जुनियरतर्फ काव्याश्री दाहाल विजेता बनेकी छन्।
इटहरी आर्ट एण्ड फाउन्डेसनको आयोजनामा साउन १६ गतेदेखि सञ्चालन भएको प्रतियोगितामा विभिन्न विद्यालयका ३१ जना बालबालिकाको सहभागिता रहेको थियो। करिब एक महिनासम्म विभिन्न चरणका तालिम तथा गतिविधि सञ्चालन गरेपछि भदौ २१ गते इटहरीस्थित दुर्गा पार्टी प्यालेसमा आयोजित समारोहमा विजेता घोषणा गरिएको हो।
लिटिल मिसतर्फ नेपाल डीभीएम स्कुलकी युनिशा निरौला विजेता बनिन्। खुसी अधिकारी फर्स्ट रनरअप र आयुषा निरौला सेकेन्ड रनरअप घोषित भए। जुनियरतर्फ नेपाल डीभीएम स्कुलकी काव्याश्री दाहाल विजेता, ब्लुमिङ किन्डर गार्डेनकी रियान्सी निरौला फर्स्ट रनरअप तथा नेपाल डीभीएम स्कुलकी सर्वज्ञा अधिकारी सेकेन्ड रनरअप बने।
त्यस्तै, लिटिल मास्टरतर्फ चिजन प्यालेस स्कुलका हर्षिल आचार्य विजेता बने। पहिलो पाइला मन्टेसोरीका एभिस सुवेदी फर्स्ट रनरअप तथा चिजन प्यालेसका सारम्स चौधरी सेकेन्ड रनरअप घोषित भए।
प्रतियोगिताका क्रममा बालबालिकालाई मूर्तिकला, लेखन, चित्रकला, व्यक्तित्व तथा नेतृत्व विकास र ट्राफिक सचेतनालगायतका विषयमा प्रशिक्षण दिइएको थियो। अभिभावकको सहभागितामा अटिजमसम्बन्धी अन्तरक्रिया कार्यक्रमसमेत आयोजना गरिएको आयोजकले जनाएको छ।
फाउन्डेसनका अनुसार प्रतियोगिता केवल उपाधिका लागि नभई बालबालिकाको प्रतिभा पहिचान, आत्मविश्वास, सिर्जनशीलता, नेतृत्व क्षमता र सामाजिक चेतना विकास गर्ने उद्देश्यले आयोजना गरिएको हो।
कार्यक्रममा वरिष्ठ साहित्यकार तथा शिक्षाविद् मनु मञ्जिलले बालबालिकामा लुकेको प्रतिभा पहिचान गरी उनीहरूलाई आफ्नो क्षमता प्रस्तुत गर्ने अवसर दिनु महत्वपूर्ण रहेको बताए।
यसैबीच, लामो समयदेखि कला तथा संगीत क्षेत्रमा योगदान पुर्याउँदै आएका वरिष्ठ लोकगायक बालकृष्ण कार्कीलाई सम्मान गरिएको थियो।
प्रतियोगिताका विजेता काव्याश्री दाहाल र सारम्स चौधरीका अभिभावकले आफ्ना छोराछोरीले प्राप्त गरेको पुरस्कार रकम भोटेकोशी बाढीपीडितका लागि राहतस्वरूप प्रदान गर्ने घोषणा गरेका छन्।
फाउन्डेसनका अध्यक्ष तुलसी घिमिरेले प्रतियोगिताको मुख्य उपलब्धि उपाधिभन्दा पनि बालबालिकाले प्राप्त गरेको सिकाइ र अनुभव भएको बताए। उनले प्रतियोगितालाई राष्ट्रिय सौन्दर्य प्रतियोगितासँग तुलना नगरी बालबालिकाको सिकाइ र प्रतिभा विकास गर्ने अवसरका रूपमा बुझ्न अभिभावकलाई आग्रह गरे।
