काठमाडाैँ । नेपाली परिकारलाई अन्तर्राष्ट्रिय मञ्चमा चिनाएका चर्चित सेफ सन्तोष साह ठगीसम्बन्धी विवादमा पक्राउ परेपछि हाजिरी जमानीमा रिहा भएका छन्।
जिल्ला प्रहरी परिसर काठमाडौंका अनुसार गैरीधारास्थित रेस्टुरेन्ट खरिद–बिक्रीसँग जोडिएको आर्थिक विवादमा पीडित पक्षले दाबी गरेको ४ लाख ५० हजार रुपैयाँ बुझाएपछि साह सोमबार साँझ रिहा भएका हुन्।
प्रहरीका अनुसार साहविरुद्ध रकम नभएको बैंक खाताको चेक दिएको आरोपमा उजुरी परेको थियो। सोही विषयमा पीडित शकुन्तला अधिकारी थापाले यसअघि २५ लाख रुपैयाँको चेक अनादर मुद्दा दायर गरेकी थिइन्। उक्त मुद्दामा अदालतले साहलाई दोषी ठहर गर्दै २५ लाख रुपैयाँ बिगो भराउने, १ महिना कैद र १ लाख २५ हजार रुपैयाँ जरिवानाको फैसला सुनाइसकेको छ।
फैसला सुनाइँदा अदालतमा उपस्थित नभएका साहलाई पछिल्लो उजुरीका आधारमा काठमाडौँ उपत्यका अपराध अनुसन्धान कार्यालयको टोलीले गत शुक्रबार जनकपुरबाट पक्राउ गरेको थियो। त्यसयता प्रहरी हिरासतमा रहेका उनी पीडितलाई दाबी गरिएको रकम उपलब्ध गराएपछि रिहा भएका हुन्।
