काठमाडौं । अख्तियार दुरूपयोग अनुसन्धान आयोगले राहदानी विभागका महानिर्देशक तीर्थराज अर्याललाई नियन्त्रणमा लिएर अनुसन्धान थालेको छ। स्रोतका अनुसार मंगलबार अर्याललाई नियन्त्रणमा लिएर राहदानी आपूर्ति सम्बन्धी विषयमा बयान लिने कार्य भइरहेको छ।
अनुसन्धानका क्रममा अख्तियारको टोलीले विभागबाट आवश्यक कागजातसमेत संकलन गरेको बताइएको छ। एक स्रोतका अनुसार आयोगको टोलीले सोमबार साँझ विभाग पुगेर सम्बन्धित कागजातहरू आफ्नो नियन्त्रणमा लिएको थियो।
राहदानी खरिद तथा आपूर्ति प्रक्रियासँग जोडिएको आशंकामा व्यवसायी सिद्धार्थ थापालाई पनि अख्तियारले नियन्त्रणमा लिएर अनुसन्धान अगाडि बढाएको छ ।
अख्तियारले घटनासम्बन्धी थप अनुसन्धान जारी राखेको जनाएको छ। अनुसन्धानको निष्कर्षपछि मात्रै प्रकरणको वास्तविक अवस्था स्पष्ट हुने अपेक्षा गरिएको छ।
