काठमाडौं । राष्ट्रिय स्वतन्त्र पार्टी (रास्वपा)ले आफ्नो ऐतिहासिक प्रथम राष्ट्रिय महाधिवेशनको तयारी तीव्र बनाएको जनाएको छ।
पार्टीका महामन्त्री कविन्द्र बुर्लाकोटीका अनुसार हालसम्म देशभर ४,३६३ वटा वडाको अधिवेशन सम्पन्न भइसकेको छ भने ६०९ वटा पालिका र ६४ वटा जिल्लाको अधिवेशन सम्पन्न भएको छ।
पार्टीका अनुसार कर्णाली प्रदेशका डोल्पा र हुम्ला, लुम्बिनी प्रदेशको रुकुम पूर्व, गण्डकी प्रदेशका मनाङ र मुस्ताङ तथा मधेस प्रदेशका धनुषा, सप्तरी, बारा र सर्लाही जिल्लामा अधिवेशन हुन बाँकी रहेको छ।
त्यस्तै, सिन्धुपाल्चोक, सिराहा, महोत्तरी र रौतहट जिल्लामा अधिवेशन प्रक्रिया सुरु भए पनि विभिन्न कारणले स्थगन भएको जनाइएको छ।
रास्वपाले कोशी प्रदेश, बागमती प्रदेश, गण्डकी प्रदेश र लुम्बिनी प्रदेशको प्रदेश अधिवेशन सम्पन्न भइसकेको जनाएको छ। मधेस प्रदेशको अधिवेशन हाल स्थगित रहेको छ भने कर्णाली प्रदेश र सुदूरपश्चिम प्रदेशमा अधिवेशन प्रक्रिया जारी रहेको छ।
पार्टीको प्रथम राष्ट्रिय महाधिवेशन आगामी असार ७, ८ र ९ गते चितवनमा आयोजना हुने तय भएको छ। महाधिवेशनलाई सफल बनाउन आवश्यक तयारी तीव्र गतिमा अगाडि बढाइएको महामन्त्री बुर्लाकोटीले जानकारी दिएका छन्।
