काठमाडौं । विश्व शान्ति, करुणा र सहअस्तित्वको सन्देश फैलाउने उद्देश्यसहित विश्वव्यापी तीर्थयात्रा तथा शान्ति पदयात्रामा रहनुभएका श्रद्धेय भिक्षु पन्नाकर र उहाँको भिक्षुसंघ प्रतिनिधिमण्डलले आज अपराह्न पवित्र स्वयम्भू महाचैत्यको दर्शन गर्नुभएको छ।
उहाँहरूको यस पवित्र भ्रमणका क्रममा अन्तर्राष्ट्रिय रूपमा पीस डगका नामले परिचित तथा सबैको माया पाएका आलोकाको समेत विशेष उपस्थिति रहेको थियो। शान्ति, मैत्री र समस्त प्राणीप्रति करुणाको प्रतीकका रूपमा चिनिने आलोका पनि यस आध्यात्मिक यात्राको महत्वपूर्ण अंग बनेका छन्।
स्वयम्भू महाचैत्यमा उपस्थित भई श्रद्धेय भिक्षु पन्नाकर र उहाँको प्रतिनिधिमण्डलले भगवान बुद्धका शान्ति, करुणा र अहिंसाका शिक्षालाई आत्मसात् गर्दै विश्वभर सद्भाव, सहिष्णुता र विश्वशान्तिको सन्देश प्रवाह गरिरहेको उल्लेख गरिएको छ।
उहाँहरूको यस आगमनले स्वयम्भू महाचैत्यको आध्यात्मिक गरिमा अझ उजागर गर्नुका साथै विश्व शान्तिका लागि जारी महान अभियानप्रति सम्मान प्रकट भएको बताइएको छ।
भ्रमणका अवसरमा श्रद्धेय भिक्षु पन्नाकर, भिक्षुसंघ प्रतिनिधिमण्डल तथा पीस डग आलोकालाई स्वयम्भू महाचैत्य परिसरमा हार्दिक स्वागत तथा शुभकामना व्यक्त गरिएको थियो।
