काठमाडाैँ । राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानबहादुर शाहीले भौतिक पूर्वाधार मन्त्री सुनिल लम्सालद्वारा “खुट्टा भाँच्ने” भन्ने अभिव्यक्ति दिइएको विषयमा भइरहेको आलोचनाप्रति प्रतिक्रिया जनाएका छन्।
शाहीले सामाजिक सञ्जालमा लेख्दै उक्त अभिव्यक्तिलाई हिंसा प्रवर्द्धन गर्ने अर्थमा नभई कानुन मिच्ने, लापरवाही गर्ने तथा जनताको कामप्रति बेवास्ता गर्ने प्रवृत्तिविरुद्ध दिइएको कडा सन्देशका रूपमा बुझ्नुपर्ने बताएका छन्।
उनका अनुसार जनताको सेवा गर्न जिम्मेवारीमा रहेका व्यक्तिहरूले काममा ढिलासुस्ती गर्ने, राज्य संयन्त्रलाई कमजोर बनाउने तथा उत्तरदायित्वबाट पन्छिने प्रवृत्तिलाई नियन्त्रण गर्न आवश्यक छ। उनले त्यस्ता क्रियाकलाप गर्नेहरूलाई संरक्षण होइन, कानुनी दायरामा ल्याई कडा कारबाही गर्नुपर्ने धारणा व्यक्त गरेका छन्।
शाहीले अनुशासन, जवाफदेहिता र परिणाममुखी कार्यसंस्कृति स्थापित नगरी सुशासन सम्भव नहुने उल्लेख गर्दै देशले अपेक्षित विकास गति लिनका लागि जिम्मेवारीबाट भाग्नेहरूलाई कानुनअनुसार उत्तरदायी बनाउने समय आएको पनि बताएका छन्।
