काठमाडौँ । नेपाली कम्युनिष्ट पार्टीका सांसद धनबहादुर बुढाले यार्सागुम्बा उत्पादनमा आएको तीव्र गिरावटका कारण हिमाली क्षेत्रको अर्थतन्त्र गम्भीर संकटमा परेको बताएका छन्।
सोमबार प्रतिनिधि सभाको बैठकमा बोल्दै सांसद बुढाले यस वर्ष यार्सागुम्बा उत्पादन करिब ६० प्रतिशतभन्दा बढीले घटेको अनुमान गरिएको जानकारी दिए। उनका अनुसार जलवायु परिवर्तन, अव्यवस्थित संकलन तथा अन्य कारणले उत्पादन निरन्तर घट्दै गएको छ।
उनले यार्सागुम्बा केवल एक जडीबुटी मात्र नभई कर्णाली र अन्य हिमाली जिल्लाको आर्थिक मेरुदण्ड भएको उल्लेख गर्दै उत्पादन घट्नुले सम्पूर्ण हिमाली अर्थतन्त्रमा गम्भीर असर परेको बताए।
“डोल्पासहित १२ हिमाली जिल्लाका हजारौँ परिवारको वार्षिक आम्दानी यार्सागुम्बामा निर्भर छ। उत्पादन घटेसँगै बजार सुनसान भएका छन्, हजारौँ परिवारको आम्दानी गुमेको छ र धेरै घरमा खाद्य संकटको चिन्ता बढेको छ,” उनले सदनमा भने।
सांसद बुढाले सरकारले वर्षौंदेखि यार्सागुम्बाबाट करोडौँ रुपैयाँ राजस्व संकलन गरे पनि संकटमा परेका संकलक र स्थानीय समुदायका पक्षमा प्रभावकारी पहल नगरेको आरोप पनि लगाए।
उनले सरकारसमक्ष तीनबुँदे माग प्रस्तुत गर्दै यार्सागुम्बा संरक्षण, संकलकको सुरक्षा तथा उद्धार बीमा, ब्रान्डिङ र दिगो बजार व्यवस्थापनका लागि वैज्ञानिक तथा दीर्घकालीन नीति तत्काल ल्याउन आग्रह गरे।
त्यस्तै, प्रभावित परिवारको अवस्था मूल्याङ्कन गरी राहत उपलब्ध गराउन तथा डोल्पामै यार्सागुम्बा र अन्य जडीबुटी प्रशोधन केन्द्र स्थापना गरेर स्थानीय रोजगारी र दिगो पर्यटनसँग जोडिएको जीविकोपार्जन कार्यक्रम सञ्चालन गर्न पनि उनले माग गरे।
सांसद बुढाले हिमाली जनताको आवाजप्रति सरकार संवेदनशील बन्नुपर्ने आवश्यकता औँल्याउँदै तत्काल ठोस कदम चाल्न आग्रह गरे।
