काठमाडौँ । राष्ट्रिय स्वतन्त्र पार्टी (रास्वपा) ले संसद्भित्र प्रयोग भएका केही शब्दप्रति आपत्ति जनाउँदै ती अभिव्यक्तिहरूलाई अभिलेखबाट हटाउन माग गरेको छ।
प्रतिनिधिसभा बैठकमा रास्वपा सांसद समीक्षा बास्कोटाले नियमापत्ति जनाउँदै प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङदेम्बेले प्रयोग गरेका केही शब्दहरू ‘अशिष्ट’ र ‘अपमानजनक’ भएको बताइन्। उनले प्रतिनिधिसभा नियमावलीको नियम २१ (घ) स्मरण गराउँदै अशिष्ट, अश्लील तथा मर्यादाहीन शब्द प्रयोग गर्न नपाइने व्यवस्था रहेको उल्लेख गरिन्।
बास्कोटाले ‘सदनको चीरहरण’, ‘मुर्दा लास’ र ‘मुर्दा शान्ति’ जस्ता अभिव्यक्तिहरू संसद्को मर्यादा विपरीत भएको दाबी गर्दै ती शब्दहरू संसद्को अभिलेखबाट हटाउन सभामुखसँग आग्रह गरिन्।
उनले संसद् कुनै दल विशेषको नभई नागरिकको आवाज उठाउने साझा थलो भएको उल्लेख गर्दै मर्यादित बहस आवश्यक रहेको बताइन्।
यसैबीच, उनले सत्तापक्षका सांसदहरूलाई लक्षित गरी प्रयोग गरिएका अपमानजनक शब्दप्रति पनि आपत्ति जनाउँदै यस्ता अभिव्यक्तिले संसद्को गरिमा घटाउने टिप्पणी गरिन्।
